Qazaqstanda fýtboldan Stýdentter Ulttyq lıgasy quryldy
ASTANA. QazAqparat - Qazaqstanda fýtboldan Stýdentter Ulttyq lıgasy quryldy. Búgin QR Bilim jáne ǵylym mınıstri Aslan Sárinjipov pen Qazaqstan Fýtbol federatsııasynyń bas hatshysy Allen Shaıjúnisov atalmysh lıgany qurý boıynsha yntymaqtastyq memorandýmyna qol qoıdy.
«Stýdentter lıgasy jastar arasynda buqaralyq fýtboldyń qarqyn alýyna, úlken fýtboldyń damýyna zor úles qosady dep oılaımyn. Damyǵan elderde stýdenttik sport mańyzdy ındýstrııaǵa aınalǵan. Bizdiń joǵary oqý oryndarymyz jalpy úderisten qalmaýyn qamtamasyz etýimiz shart», - deıdi A. Sárinjipov.
Taraptardyń aıtýynsha, atalmysh qujat birinshi kezekte oqýshylar men stýdentterdi tartý arqyly buqaralyq fýtboldy damytýǵa baǵyttalǵan. «Yntymaqtastyq memorandýmynyń aıasynda bilim oshaqtary arasynda aımaqtyq jáne respýblıkalyq týrnırler uıymdastyrylyp turatyn bolady. Sondaı-aq elimizdiń barlyq joǵary oqý oryndaryn biriktiretin fýtboldan Stýdentter Ulttyq lıgasy qurylady», - dep atap ótti A.Shaıjúnisov.
Lıganyń ashylý rásimi 14 mamyrda Astanadaǵy «Avtomobılıst» stadıonynda ótedi. Stýdentter ulttyq lıgasynyń birinshi kezeńine 8 komanda qatysady: Nazarbaev Ýnıversıteti, L.Gýmılev atyndaǵy Eýrazııalyq Ulttyq ýnıversıteti, S.Seıfýllın atyndaǵy Qazaq agrotehnıkalyq ýnıversıteti, Qazaqstan-Reseı ýnıversıteti, Qarjy polıtsııasy ýnıversıteti, Medıtsınalyq ýnıversıtet, Qazaq memlekettik zań ýnıversıteti men Qarjy akademııasy. «Avtomobılıst» stadıonynan bólek, lıga oıyndary EUÝ men Nazarbaev Ýnıversıtetiniń stadıondarynda ótedi.
Qyrkúıek aıynan bastap Stýdentter Ulttyq lıgasyna elimizdiń barlyq joǵary oqý oryndary qatysatyn bolady dep josparlanýda.
