Qazaqstanda fýtbol klýbynyń bas bapkeri kúmándi matchtarǵa baılanysty shettetildi
ASTANA. KAZINFORM - Qazaqstan chempıonatynyń Birinshi lıgasynda oıyn kórsetetin «Arys» fýtbol klýbynyń basshylyǵy kúdikti matchtar týraly ýaqytynda habarlamaǵany úshin jazalandy.
Qazaqstan fýtbol federatsııasynyń baqylaý, tártiptik jáne etıka komıteti «Arys» fýtbol klýby men onyń basshylyǵyna qatysty resmı sheshim shyǵardy. Onda sanktsııalar qyzmettik tergeý jáne kelisilgen matchtarǵa qarsy kúres saıasaty aıasynda qoldanyldy.
Komıtettiń resmı sheshimine sáıkes, «Arys» fýtbol klýbynyń bas bapkeri Ǵalymjan Esenbaev QFF aıasyndaǵy barlyq jarystardan uzaq merzimge shettetildi. Ol 2027 jyldyń 1 tamyzyna deıin belgilengen. Jaza oǵan matchtardyń nátıjesine áser etý áreketi týraly ózine belgili bolǵan faktini habarlamaǵany úshin berildi.
Klýb dırektory Arman Pirmanovqa QFF-nyń reglamenttik qujattarynyń talaptaryn qamtamasyz etý jónindegi mindetterdi tıisinshe oryndamaǵany úshin resmı eskertý jarııalandy. Sonymen qatar, «Arys» fýtbol klýbyna tergeý barysynda federatsııanyń ókimin oryndamaǵany jáne kelisilgen matchtarǵa qarsy saıasatty saqtamaǵany úshin 50 AEK kóleminde aqshalaı aıyppul salyndy. Klýb bul somany 2026 jyldyń 3 jeltoqsanyna deıin qosa alǵanda tóleýge mindetti.
«Arys» FK dırektory Arman Pırmanov bul jaǵdaıǵa qatysty áleýmettik jelidegi paraqshasynda pikir bildirip, oqıǵalardyń hronologııasyn klýb tarapynan túsindirdi.
Basshynyń aıtýynsha, mamyr aıyna deıin komanda birneshe oıyn boıy jeńilistiń aşy dámin tatty. Sebebin anyqtaý úshin Arman Pirmanov bas bapker Ǵalymjan Esenbaevpen birge ishki tekserý júrgizgen. Jeńilgen oıyndardyń beınejazbasy jınaqtalǵan. Ony taldaýǵa syrttan mamandardy tartqan.
Ony zertteý barysynda basshylyq negizgi quram oıynshylarynyń áreketindegi keleńsiz kórinisterdi ózderi anyqtap, kúmándi goldardyń bolǵanyn anyqtaǵan. Jınaqtalǵan beınejazbalardy klýb óz betinshe quzyrly organdarǵa tekserý úshin tapsyrǵan.
Arman Pirmanov «Arys» fýtbol klýby kelisilgen kezdesýlerdi uıymdastyrýǵa qatysqan joq jáne qatyspaıtynyn atap ótti. Kerisinshe bolyp jatqan jaǵdaı týraly ózi bastama kóterip málimdegen. Dırektor QFF tujyrymyna nazar aýdardy, oǵan sáıkes klýb tek anyqtalǵan kúmándi jaǵdaı týraly kesh habarlaǵandyqtan ǵana sanktsııa alǵan.
Málimdemesiniń sońynda Arman Pirmanov «Arys» fýtbol klýbynyń basshylyǵy jazanyń qatal bolýymen túbegeıli kelispeıtinin jáne resmı apellıatsııa beretinin habarlady.
Eske salsaq, «Ordabasy» 2026 jylǵy Qazaqstan kýbogynyń ıegeri atandy.
