Qazaqstanda fýtbol ınfraqurylymyn damytý qajet – UEFA prezıdenti
ASTANA. KAZINFORM – Eýropa fýtbol qaýymdastyqtary Odaǵynyń (UEFA) prezıdenti Aleksander Cheferın Qazaqstanǵa resmı sapary aıasynda elordadaǵy Qazaqstan fýtbol federatsııasynyń keńsesine bardy.
Cheferın QFF-nyń shtab-páterinde Federatsııa prezıdenti Marat Omarovpen júzdesti. Sondaı-aq ol fýtbol mýzeıin aralap, «Jeńis», «Astana» jáne №8 MBJSORM fýtbol ortalyqtarynyń jas oıynshylarymen, sonymen qatar TsP fýtbol men Blind Football komandasymen kezdesti.
Osydan keıin Marat Omarovpen Aleksander Cheferın BAQ ókilderine arnalǵan aqparattyq brıfıngige qatysty.
– Búgin – el fýtboly úshin erekshe kún. Qazaqstanǵa resmı saparmen UEFA prezıdenti Aleksander Cheferın myrza kelip otyr. Bul mańyzdy sapar – elimizdiń halyqaralyq jan-jaqty baılanystarynyń tereńdeı túskeniniń taǵy bir naqty da jarqyn kórinisi, - dedi Omarov.
QFF prezıdenti Memleket basshysy Qasym-Jomart Toqaev UEFA prezıdentin qabyldap, otandyq fýtboldyń qazirgi jaǵdaıy men bolashaǵyna qatysty birqatar túıindi máseleni talqylaǵanyn aıtty.
– Qazaqstan fýtbol federatsııasy tarapynan qazaq fýtbolyn damytýǵa baılanysty usynystarymyzdy jetkizdik. Olar negizinen elimizdegi fýtbol ınfraqurylymyn jetildirý, buqaralyq fýtboldy qoldaý jáne balalar fýtbolyn damytý baǵyttaryn qamtydy. Qazaqstan fýtbolynyń áleýeti zor. Birlese jumys istep, halyqaralyq deńgeıde joǵary nátıjelerge jete alamyz dep bek senemin, - dedi Omarov.
Óz kezeginde Aleksander Cheferın de UEFA Qazaqstan fýtbolyna qoldaý kórsetýge daıyn ekenin atap ótti.
– Búgin Prezıdent Toqaevpen óte nátıjeli kezdesý ótkizdik. Onyń sport pen fýtboldy erekshe baǵalaıtynyn baıqadym. Oıymyz bir jerden shyqty: Qazaqstanda fýtbol ınfraqurylymyn damytý qajet, - dedi UEFA prezıdenti.
Sonymen qatar Cheferın Eýropa fýtbol qaýymdastyqtary Odaǵy bolashaqta Qazaqstan fýtbolyn damytýǵa barynsha kómektesip, ınvestıtsııa salatynyn aıtty.
– Biz óz múshelerimizdiń barynsha tabysty bolǵanyn qalaımyz. Qazaqstanda talantty fýtbolshylar kóp. Sondyqtan jastardy damytýǵa erekshe kóńil bólý kerek, - dedi Cheferın.
Sapar sońynda Eýropa fýtbol basshysy elordadaǵy fýtbol ınfraqurylymymen tanysty.
Aıta keteıik, Qazaqstan – 2002 jyldan bastap ÝEFA-nyń tolyqqandy múshesi.
Osyǵan deıin habarlaǵanymyzdaı, Memleket basshysy Qasym-Jomart Toqaev UEFA prezıdenti Aleksander Cheferındi qabyldady.
Eske salsaq, búgin fýtboldan Astanada álemdik jáne qazaqstandyq fýtbolshylardan quralǵan «Ańyzdar oıyny» kezdesýi ótedi.