Qazaqstanda frantsýz ınvestıtsııasy bar 170 kompanııa jumys isteıdi
ASTANA. KAZINFORM — Astanada Qazaqstan men Frantsııa arasyndaǵy iskerlik baılanystardy damytýǵa arnalǵan Qazaqstan-Frantsııa bıznes-forýmy ótti.
Onda Qazaqstan ekonomıkasynyń negizgi salalaryna — energetıka, agroónerkásip, densaýlyq saqtaý, kólik ınfraqurylymy jáne ornyqty qalalyq damý baǵyttaryna frantsýz ınvestıtsııasyn tartý jáne áriptestikti keńeıtý máseleleri talqylandy.
Syrtqy ister mınıstriniń orynbasary Álibek Qýantyrov Qazaqstan men Frantsııa arasyndaǵy ınvestıtsııalyq jáne saýda-ekonomıkalyq ózara is-qımyldyń qarqyndy damyp kele jatqanyn atap ótti.
− Frantsııa − Qazaqstannyń Eýropalyq odaqtaǵy basty áriptesteriniń biri. Búginde elimizde frantsýz kapıtalynyń qatysýymen TotalEnergies, Orano, Alstom, Vicat, Danone, Air Liquide sııaqty 170-ten astam kompanııa jumys isteıdi. Frantsııa Qazaqstannyń eń iri 10 saýda seriktesiniń qataryna kiredi jáne EO elderi ishinde ınvestıtsııa kólemi boıynsha birinshi orynda tur — sońǵy jyldary bul kórsetkish $17 mlrd-tan asty. Ótken jyly 300 mln dollar kóleminde 6 birlesken joba júzege asyryldy, al qazir 20-dan astam bastama qaralyp jatyr. Biz frantsýz bıznesiniń Qazaqstan ekonomıkasyna qosqan úlesin joǵary baǵalaımyz jáne ınvestorlarǵa barynsha qolaıly jaǵdaı jasaýǵa daıynbyz, − dedi vıtse-mınıstr forýmnyń ashylýynda.
Forým aıasynda «Yntymaqtastyqty nyǵaıtý, ártaraptandyrý jáne ınnovatsııalar — Qazaqstan-Frantsııa qarym-qatynastarynyń damý bolashaǵy» taqyrybynda plenarlyq jáne 4 paneldik sessııa ótti. Bul úshin Frantsııanyń Vinci, Sanofi, Schneider Electric, EDF, Veolia, Limagrain, Egis, Orano, Danone, Air Liquide, Bonduelle, Axens, Richel, IMV Technologies sııaqty jetekshi kompanııalarynyń basshylary keldi.
Paneldik sessııalar energetıka men kólik ınfraqurylymyn damytý, azyq-túlik qaýipsizdigi men agroónerkásiptik yntymaqtastyq, densaýlyq saqtaý jáne bıotehnologııalar, sondaı-aq ornyqty qalalyq damý jáne kommýnaldyq qyzmet kórsetý taqyryptaryna arnaldy.
Frantsııalyq spıkerler qazaqstandyq naryqqa qyzyǵýshylyq joǵary ekenin aıtyp, basym salalarda birlesken jobalardy iske asyrýǵa daıyn ekenin bildirdi. Ornyqty damý, jergilikti óndiristi arttyrý, tehnologııalar transferi jáne eki el kompanııalary arasyndaǵy iskerlik baılanystardy nyǵaıtý máselelerine erekshe nazar aýdaryldy.
Forým qorytyndysy retinde túrli salalarda birlesken jobalardy iske asyrýǵa baǵyttalǵan kommertsııalyq kelisimderge qol qoıyldy. Sonymen birge, B2B jáne B2G formattarynda kezdesýler uıymdastyrylyp, qatysýshylar naqty bastamalardy jáne memleketter arasyndaǵy praktıkalyq yntymaqtastyqtyń keleshegin talqylady.
Aıta keteıik, elordada Italııa-Qazaqstan jetkizý tizbegi jónindegi halyqaralyq forýmy qatar ótip jatyr.