Qazaqstanda frantsýzdardyń dári-dármek eksporty kúrt ósti - elshi Eten
ASTANA. QazAqparat - Frantsııanyń Qazaqstandaǵy Tótenshe jáne Ókiletti elshisi Frensıs Etenniń aıtýynsha, Frantsııadan Qazaqstanǵa jetkiziletin dári-dármekterdiń kólemi bir jyldyń ishinde kúrt ósti, dep xabarlaıdy QazAqparat tilshisi.
«Qazaqstanda xalyqtyń ál-aýqatyn jaqsartýǵa, ómir súrýdi uzartýǵa degen saıası ustanym bar. Biz ony anyq kórip otyrmyz. Prezıdent Nazarbaev óte batyl maqsat qoıyp otyr. Bolashaqta Qazaqstanda ómir súrý uzaqtyǵy 80 jasqa deıin jetýi tıis. Negizi, osy eldiń bıýdjeti men ekonomıkasyn eskersek, ol maqsatqa jetýge tolyq múmkindik bar. Osy oraıda aıta ketken jón, Qazaqstan men Frantsııanyń farmatsevtıka salasyndaǵy yntymaqtastyǵy nyǵaıyp keledi. Máselen, bir jyldyń ishinde Frantsııadan Qazaqstanǵa jetkizilgen farmatsevtıka ónimderiniń kólemi 58 paıyzǵa artty», - dedi Frensıs Eten búgin qant dıabeti máselelerine arnalǵan xalyqaralyq konferentsııada.
Elshiniń sózine qaraǵanda, Frantsııada densaýlyq saqtaý salasynyń damyǵany sonsha, sońǵy 70 jyldyń ishinde frantsýzdardyń ómir súrý deńgeıi 20 jylǵa uzardy. «Búginde Frantsııa osy kórsetkish jaǵynan álem boıynsha úzdik on eldiń qataryna kiredi», - dep atap kórsetti Eten myrza.
