Qazaqstanda frantsýz tehnologııasy boıynsha eshki irimshigi óndirisi ashylady

PARIJ. QazAqparat – Parıj, 2021 jyldyń 19 aqpany – Qazaqstannyń Frantsııadaǵy Elshici Jan Ǵalıev «D. A. E.» kompanııasynyń basshysy Davıd Ammemen kezdesti.Kelissózder barysynda frantsýz kásipkeri jergilikti shıkizat pen jumys kúshin paıdalana otyryp, Almaty oblysynda eshki sútinen irimshik óndirisin ashý týraly josparlarymen bólisti, dep habarlaıdy QazAqparat QR Syrtqy ister mınıstrliginiń resmı saıtyna silteme jasap.

Óndiriske bastapqy ınvestıtsııalardyń kólemi 1 mln eýrony quraıdy. Jobany qarjylandyrýǵa «Kairos Advice» halyqaralyq ınvestıtsııalyq-konsaltıngtik kompanııasynyń Bas dırektory Aıgúl Saınova da qatysady. Óndiristi damytý úshin Frantsııadan asyl tuqymdy mal ımporty, sondaı-aq tehnologııalar transferi men tájirıbemen bólisý kózdeledi.

Elshi bul joba Qazaqstan men Frantsııa arasyndaǵy yntymaqtastyqtyń basym salalarynyń biri bolyp tabylatyn aýyl sharýashylyǵyna sáıkes keletinin atap ótti. Onyń aıtýynsha, eshki sútinen jasalǵan irimshiktiń EAEO, QHR jáne Ortalyq Azııa elderiniń naryqtaryna jetkizýdiń eleýli áleýeti bar. Elshi atalǵan jobaǵa QR SІM, «Kazakh Invest «UK» AQ jáne basqa da múddeli vedomstvolar tarapynan qajetti súıemeldeý kórsetiletinine sendirdi.

Kezdesý qorytyndysy boıynsha D.Amme Qazaqstan Elshiligine qoldaý kórsetkeni úshin alǵysyn bildirdi. Frantsýz ınvestory aldaǵy ýaqytta jobany bastap, eshki irimshiginiń alǵashqy partııasyn tutynýshylarǵa usyný úshin Qazaqstanǵa barýdy kózdep otyr.