Qazaqstanda frantsýz kapıtalynyń qatysýymen 160 kompanııa jumys isteıdi

NUR-SULTAN. QazAqparat - Qazaqstan men Frantsııa arasyndaǵy taýar aınalymy 2018 jyly 32,5% artty. Bul týraly QR Indýstrııa jáne ınfraqurylymdyq damý mınıstri Roman Sklıar Qazaqstandaǵy Frantsııa elshisi Fılıppın Martınemen ekijaqty kezdesý barysynda aıtty, dep habarlaıdy QazAqparat.

Mınıstr atap ótkendeı, Frantsııa Qazaqstannyń negizgi saýda seriktesteriniń alǵashqy bestigine kiredi jáne elimizdiń ekonomıkasyndaǵy negizgi ınvestorlardyń biri bolyp tabylady.

«Búgingi tańda ekonomıkalyq yntymaqtastyq jónindegi qazaqstan-frantsýz Úkimetaralyq komıssııasy men qazaqstan-frantsýz iskerlik keńesi belsendi jumys isteýde. Úkimetaralyq komıssııa saýda-ekonomıkalyq yntymaqtastyqty, bıznes pen eki el azamattarynyń baılanysyn keńeıtý úshin barlyq qajetti jaǵdaılar jasalatyn negizgi alań bolyp tabylady», - dedi Roman Sklıar.

Vedomstvo basshysynyń málimetinshe, elderimiz arasyndaǵy taýar aınalymy ósimniń oń serpinine ıe. 2018 jyldyń qorytyndysy boıynsha Qazaqstan men Frantsııa arasyndaǵy syrtqy saýda aınalymy 32,5% ósip, 4,5 mlrd AQSh dollaryn (2017 jyly - 3,3 mlrd AQSh) qurady. Qazaqstannan Frantsııaǵa eksport 2018 jyly 35% artyp, 3,8 mlrd AQSh dollary (2017 jyly - 2,8 mlrd. AQSh dollary) boldy.

Eksporttyń negizgi taýarlary: shıki munaı 1,4 mlrd AQSh dollary (98,7%), tabıǵı ýran 13,7 mln AQSh dollary (0,9%), shassı jáne olardyń bólikteri 0,9 mln AQSh dollary (0,1%), basqa hromattar men dıhromattar; peroksohromattar 0,8 mln AQSh dollary (0,1%) jáne taǵy basqasy.

Frantsııadan ımport 2018 jyly 24% ósip, 661 mln AQSh dollaryn (2017 jyly - 535 mln AQSh dollary) qurady.

2019 jylǵy qańtar-sáýirde Qazaqstan men Frantsııa arasyndaǵy syrtqy saýda aınalymy 1,4 mlrd AQSh dollary boldy.

Sońǵy 14 jylda Frantsııadan Qazaqstanǵa tikeleı ınvestıtsııalardyń jalpy aǵyny 15 mlrd AQSh dollarynan asty. Búginde Qazaqstanda frantsýz kapıtalynyń qatysýymen 160 kompanııa jumys isteıdi. Olardyń arasynda «Total», «Areva», «Danone», «Renault», «Air Liquid», «Alstom» jáne taǵy basqa kompanııalar bar.

2019 jylǵy 1 sáýirdegi jaǵdaı boıynsha, Qazaqstanda frantsýzdyq qatysýmen 232 zańdy tulǵalar, fılıaldar men ókildikter tirkelgen, onyń ishinde jumys isteıtinderdiń sany - 154.

«Biz frantsýz kompanııalarynyń biliktiligi men tehnologııalaryna múddelimiz. Búginde iri frantsýz kompanııalarymen kelissózder júrgizilýde. Olarǵa jan-jaqty qoldaý kórsetýge daıynbyz», - dep atap ótti QR IIDM basshysy.