Qazaqstanda forýmdar men is-sharalar sany azaıa ma

ASTANA. KAZINFORM – QR Syrtqy ister mınıstrligi elimiz qatysatyn jáne elde ótetin forýmdar jáne basqa da is-sharalardy qysqartýǵa qatysty túsinik berdi.

Jýyrda Úkimet basshysy elimizde ótkiziletin túrli formattaǵy is-sharalarǵa jumsalatyn shyǵyndardyń azaıatyny týraly málimdedi. Osy oraıda búgin Syrtqy ister mınıstrliginde ótken baspasóz máslıhatynda: «Vedomstvo ótkizetin jáne qatysatyn is-sharalar sany azaıa ma?» degen saýal qoıyldy.

«Forýmdar men is-sharalardy tek Syrtqy ister mınıstrligi ǵana emes, barlyq memlekettik organdar ótkizedi. Árıne, birinshi kezekte joǵary basshylyqtyń tapsyrmalaryn oryndaıtyn bolamyz jáne múmkindiginshe ońtaılandyramyz. Álemdegi qazirgi geosaıası jaǵdaıdy eskere otyryp, elimiz úshin syrtqy saıasattyń róli artyp keledi. Onyń ishinde ekonomıkalyq ahýal, sanktsııa saıasaty jáne basqa da saıası protsester týraly áriptesterimizben kóbirek sóılesýimiz kerek», - dep jaýap berdi Aıbek Smadııarov.

Onyń aıtýynsha, halyqaralyq saıasatta ýaǵdalastyq kerek.

«Sondyqtan forýmdar men basqa is-sharalar sebepsiz ótkizilmeıdi. Onyń aıasynda kóptegen kelisimge qol jetkiziledi. Kórip otyrǵanyńyzdaı, bizdiń elge birde-bir sanktsııa joq, sonyń bári kelissózderdiń nátıjesi. Sondyqtan túsinistikpen qaraýdy suraımyz. Biz óz jumysymyzdy joǵary deńgeıde atqaramyz», - deıdi ol.