Qazaqstanda fılmder prokatqa shyǵar aldynda pornografııa men tyıym salynǵan kontentke tekseriledi
ASTANA. KAZINFORM - Qazaqstanda fılmderdi prokatqa shyǵarýdyń jańa tártibi bekitildi. Endi kınotýyndylar kórermenge usynylmas buryn arnaıy saraptamadan ótedi.
Tıisti erejeni Mádenıet jáne aqparat mınıstrligi bekitti. Qujatqa sáıkes, fılmderdiń mazmunyn arnaıy komıssııa qoldanystaǵy zańnama talaptaryna sáıkestik turǵysynan baǵalaıdy.
Prokat aldyndaǵy saraptama fılmderde zorlyq-zombylyqty nasıhattaý, áleýmettik, násildik, ulttyq, dinı, taptyq jáne rýlyq alaýyzdyqty qozdyrý belgilerin anyqtaý maqsatynda júrgiziledi. Sondaı-aq dástúrli emes jynystyq kózqarasty, pedofılııany jáne pornografııany nasıhattaıtyn kontentke de tekserý jasalady.
Saraptama úshin fılm avtorlary nemese quqyq ıeleri týyndyny komıssııa qaraýyna usynady. Komıssııa materıaldy taldap, talqylaý ótkizedi, keıin daýys berý arqyly sheshim qabyldap, saraptamalyq qorytyndy beredi.
Jańa tártip aıasynda fılmderdiń jas ereksheligi boıynsha jiktelýi de naqtylandy. Endi kınoónimder jeti sanatqa bólinedi:
- 6 jasqa deıin;
- 6 jastan bastap;
- 12 jastan bastap;
- 14 jastan bastap;
- 16 jastan bastap;
- 18 jastan bastap;
- 21 jastan bastap.
18+ sanatyna sýıtsıd, adam óltirý, otbasy máseleleri men ajyrasý, esirtki jáne alkogolge táýeldilik, túrli aýrýlar, qoǵamǵa jat minez-qulyq kórinisteri qamtylǵan fılmder engiziledi. Sondaı-aq sıýjet pen kórkemdik maqsatqa saı berilgen jalańashtyq, jynystyq qatynas nemese erotıkalyq kórinister, dóreki jargon sózder men beıádep leksıkasy bar týyndylar osy sanatqa jatady.
18+ belgisi bar fılmderdi telearnalarda tek saǵat 22:00-den tańǵy 06:00-ge deıin kórsetýge ruqsat etiledi.
Al 21+ sanatyndaǵy fılmderge mazmun jaǵynan qosymsha shekteý qoıylmaıdy. Degenmen mundaı týyndylar kınoteatrlarda tek túngi 00:00-den tańǵy 06:00-ge deıin kórsetiledi.
Aıta keteıik, osyǵan deıin habarlaǵanymyzdaı, otandyq fılmderdiń halyqaralyq naryqqa shyǵý múmkindigi artady.
