Qazaqstanda fermerlik ańshylyq sharýashylyqtary artýy múmkin
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qabyldady, dep habarlaıdy QazAqparat.
«Zań jobasynda ósimdikter jáne janýarlar dúnıesi salasyndaǵy zańnamany jetildirý maqsatynda mynandaı normalar kózdelýde: Orman Kodeksine Qyzyl Kitapqa engizilgen ósimdikterdi tabıǵattan alý kólemderin bekitý jóninde Úkimetke quzyret berý. Al bundaı ósimdikterdi alý tek ǵylymı jáne olardyń kólemin kóbeıtý maqsattarynda ǵana júzege asyrylady. Bul shara ósimdikterdiń sırek kezdesetin, joıylyp bara jatqan túrleriniń aınalymy máselesin retteýge múmkindik beredi. Osy kodekske engiziletin kelesi norma - ýákiletti organǵa orman zańnamasyn buzýshylardy ustaý kezindegi qujattardyń úlgisin bekitý jóninde quzyret berý. Bul orman qorǵaýshylarǵa jedel shara qoldanýǵa múmkindik beredi», - dep toqtaldy QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov zań jobasyn tanystyrý barysynda.
Sonymen qatar ol Sý kodeksine bir sý aıdynyndaǵy sý jáne balyq resýrstaryn paıdalaný quqyǵyn bekitý tártibine túzetýler engizý, Ekologııalyq koldeks aıasynda janýarlardy qonys aýdarý, ákelý men elimizden tysqary jerlerge shyǵarý tártibin naqtylaý, janýarlar sanyn retteý tártibin bekitý quzyretin Úkimetten janýarlar dúnıesi salanysyndaǵy ýákiletti organǵa berý eskerilip otyrǵandyǵyn atap ótti.
Munymen qosa, ańshylyq sharýashylyǵynyń basty túri - jabaıy ań-qus ósirýdi damytý maqsatynda «Janýarlar dúnıesin qorǵaý týraly» Zańǵa «fermerlik ańshylyq sharýashylyǵy» túsinigi engizilmek.
«Osy baǵyttaǵy jumystardy qoldaý maqsatynda ańshylyq sharýashylyqtary úshin, olardyń ósirgen janýarlardy paıdalaný tártibi men merzimin ózderiniń anyqtaý quqyǵyn berý qamtylǵan»,-dedi Myrzahmetov.
