Qazaqstanda fermerler sapasy tómen astyqtan shyǵynǵa batýy múmkin
Búgin Májiliste jaýyn-shashynnan keıin paıda bolǵan sapasy tómen astyqty paıdaǵa jaratý taqyryby talqylandy. Osy oraıda Májilistegi Agrarlyq máseleler komıtetiniń tóraǵasy Serik Egizbaev fermerlerdiń máselesin tez arada sheshý kerek ekenin aıtty, dep habarlaıdy Kazinform.
«Naqtyraq aıtsaq, 5,6 mıllıon tonnanyń (synypsyz astyq) 200 myńyn ǵana eksporttaısyzdar. Munyń ózinde Qytaı osy 200 myń tonnany naqty alatyny belsiz jáne bul kólem jalpy problemany sheshpeıtini túsinikti. Al qalǵan 5,4 mln tonnany qaıda jiberemiz? Birinshiden, bul máseleni tez arada sheshpese, tómen sanattaǵy osy astyq kóktep shyǵady nemese kúıip ketedi. Bizdiń esepteýimizshe, bul sapasyz tómen astyqtyń tonnasy 55 myń teńge bolsa, qazir sharýalardyń qoımalarynda 300 mıllıard teńgeniń ónimi jatyr. Al eki aıda ol jaramsyz bolyp qalady. Bul aqshany sharýalarǵa kim qaıtarady», - dedi S. Egizbaev.
Óz kezeginde «Qazaqstannyń Astyq odaǵy» ZTB tóraǵasy Nurlan Ospanov bıyl fermerler shyǵynǵa batýy múmkin ekenin rastady.
«Bizdiń astyq ótkizilip jatqan naryqtar sonshalyqty aýqymdy emes. Bizde Qytaı men Ortalyq Azııa bar. Budan basqa óńirlerge saýda jasaýymyz ekitalaı, óıtkeni bizge kólik shyǵyndaryn sýbsıdııalaý qajet bolady. Onsyz biz bul naryqtarǵa kirmeımiz. Sondyqtan biz árqashan dástúrli naryqtardy nazarǵa alamyz. Endi «Azyq-túlik korporatsııasy» men Aýyl sharýashylyǵy mınıstrligi bıylǵy synypqa jatpaıtyn bıdaı men besinshi surypqa qatysty máselelerdi sheshe almaýy múmkin degen pikir shynaıy sııaqty», - dedi N. Ospanov.
Onyń aıtýynsha, kólikpen ónimdi ótkizý qabiletiniń álsizdigi astyq satýǵa kedergi keltiredi.
«Bizde shyn máninde 1-1,2 mln tonna astyqty ǵana ótkize alatyn kólik ınfraqurylymy bar ekenin aıtýymyz kerek. Bizden astyq qabyldaıtyn elderde bul múmkindik odan da tómen. ıAǵnı, aıyna 1 mln tonnadan artyq júk jetkize almaımyz. Biz Qytaıǵa qalǵan ónimdi satýǵa tyrysamyz, óıtkeni olardyń tólem qabileti joǵary. Bul turǵyda QTJ-men birlese atalǵan elge júkti turaqty tıeý múmkindigin pysyqtap jatyrmyz. Ol úshin uıymdastyrý máselelerin sheshý qajet. Osy kórshi elge 1 mln tonnany jónelte alamyz. Bul rette bizde suranysy joq 3 mln tonnaǵa jýyq astyq satylmaı qalady. Túptep kelgende, fermerlerdiń shyǵynǵa ushyraýy múmkin ekenin moıyndaýymyz kerek. Endi osy máseleni egjeı-tegjeıli qarastyrý kerek», - dedi «Qazaqstannyń Astyq odaǵy» ZTB tóraǵasy.
