Qazaqstanda farmatsevtıkalyq ónim shyǵaratyn 4 zaýyt salynady
ASTANA. KAZINFORM - Úkimeti Memleket basshysynyń farmatsevtıka salasyndaǵy otandyq óndiristiń úlesin ulǵaıtý jónindegi tapsyrmalary sheńberinde dárilik zattar óndirisin oqshaýlaý jónindegi tórt iri ınvestıtsııalyq jobany iske asyrý týraly kelisimderdi maquldady.
Densaýlyq saqtaý mınıstrligi baspasóz qyzmetiniń habarlaýynsha, jobalar «AltINFARM» JShS, «MSP-ROMFARM» JShS, «Abdı Ibragım Global farm» JShS jáne «Nobel Almaty farmatsevtıkalyq fabrıkasy» AQ kompanııalarymen kelisimderi sheńberinde iske asyrylatyn bolady.
Bekitilgen jobalar boıynsha ınvestıtsııalardyń jıyntyq kólemi 173 mlrd teńgeni quraıdy, shamamen 675 jańa jumys ornyn qurý kózdelgen. Jańa qazaqstandyq farmatsevtıkalyq kásiporyndarda dárilik zattardyń 356 ataýyn óndirý josparlanyp otyr.
Tórt iri zaýyt Almaty qalasynda, sondaı-aq Túrkistan jáne Almaty oblystarynda ornalasatyn bolady. Óndiristik jeli onkologııalyq jáne qant dıabetin emdeýge arnalǵan quraldardy, sondaı-aq ımmýnobıologııalyq, vırýsqa qarsy, anemııaǵa qarsy, aýyrsynýdy basatyn, qabynýǵa qarsy, sýyqqa qarsy jáne mıkrobqa qarsy preparattardy qamtıdy. Sondaı-aq, halyqaralyq GMP standarttaryna sáıkes belsendi farmatsevtıkalyq ıngredıentter men bıopreparattar shyǵarý kózdelgen.
Jalpy kólemde densaýlyq saqtaý júıesiniń dárilik qaýipsizdigi men turaqtylyǵyn arttyrýdyń negizgi elementteriniń biri retinde 72 áleýmettik mańyzy bar dárilik zatty shyǵarý josparlanǵanyn atap ótken jón.
- Bekitilgen ınvestıtsııalyq bastamalardy iske asyrý qazaqstandyq dárilik zattar óndirisiniń úlesin edáýir arttyrýǵa, farmatsevtıkalyq naryqtyń ımportqa táýeldiligin tómendetýge, dárimen qamtamasyz etý isin turaqtandyrýǵa, halyqty otandyq óndiristiń qoljetimdi jáne sapaly dári-dármekterimen qamtamasyz etýge múmkindik beredi, - delingen Qazaqstan Respýblıkasy Densaýlyq saqtaý mınıstrliginiń baspasóz qyzmeti tartqan habarlamada.
Osyǵan deıin Qazaqstanda farmatsevtıka salasynda júzege asyrylyp jatqan iri jobalar týraly jazǵan edik.