Qazaqstanda farmatsevtıkalyq ónim óndirý kólemi artty
NUR-SULTAN. QazAqparat – Qazaqstanda óńdeý ónerkásibinde turaqty ósý baıqalyp otyr. Bul týraly QR Ulttyq ekonomıka mınıstri Áset Erǵalıev aıtyp berdi, dep habarlaıdy QazAqparat.
«Óńdeý ónerkásibinde turaqty ósý úrdisi saqtalýda. Bıylǵy qańtar-qazanda sala boıynsha óndiris kólemi 5,3%-ǵa ósti. 14 óńirde oń ósý kórsetkishi tirkeldi. Eń joǵarǵy ósý Almaty qalasynda, sondaı-aq Almaty, Qostanaı jáne Qyzylorda oblystarynda baıqalýda», - dedi mınıstr Úkimettiń búgingi otyrysynda.
Sonymen birge, Á. Erǵalıev óńdeý ónerkásibinde qarqyndy ósý kórsetken salalardy atap ótti.
«Óńdeý ónerkásibi salalary boıynsha farmatsevtıkalyq ónim óndirý 33,6%-ǵa, mashına jasaý – 19,5%-ǵa, onyń ishinde avtomobıl jasaý – 23,4%-ǵa, vagondar men lokomotıvter óndirisi – 59%-ǵa, sondaı-aq qurylys materıaldary – 9,3%-ǵa, plastmassa buıymdary – 36,5%-ǵa, daıyn metall buıymdary – 16,4%-ǵa, kıim – 11,4%-ǵa jáne jıhaz – 11,8%-ǵa qarqyndy ósýdi kórsetip otyr», - dedi ol.
Buǵan deıin Ulttyq ekonomıka mınıstri bıylǵy 10 aıdaǵy elimizdiń ekonomıkalyq damýyn baıandaǵan edi.
