Qazaqstanda Eýropalyq ımmýndaý aptalyǵy ótedi
ASTANA. QazAqparat - Densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasy aıasynda respýblıka kóleminde aǵymdaǵy jyldyń 22-26 sáýir aralyǵynda ІH Eýropalyq ımmýndaý aptalyǵy ótedi.
Bul týraly QR Densaýlyq saqtaý mınıstrliginiń baspasóz qyzmeti habarlady. Aktsııa «Saqtandyrý. Qorǵaý. Ekpe jasaý» jáne «Ómir úshin ımmýndaý» uranymen ótkiziledi.
Shara maqsaty - halyqqa ımmýndaýdyń mańyzy týraly habardarlyǵyn arttyrý, ony nasıhattaý jáne túgeldeı ekpemen qamtý bolmaq.
Profılaktıkalyq ekpeler - juqpaly aýrýlarmen kúreste eń tıimdi shara. Immýndaý aýrýlarmen kúreste jáne ony joıýda da synnan ótken qural bolyp tabylady. Dúnıejúzilik densaýlyq saqtaý uıymy (DDSU) 1967-1977 jyldary ótkizgen ımmýndaý naýqany nátıjesinde sheshek indeti joıyldy. Bul baǵdarlama iske asyrylǵanǵa deıin juqpaly aýrý álem halqynyń 60 %-yna qaýip týdyryp, aýrýǵa ushyraǵan árbir tórtinshi adam kóz jumǵan bolatyn.
DDSU-nyń málimeti boıynsha ımmýndaý jyl saıyn álemdegi 3 mln.-nan asa adamnyń ómirin jáne adamdardy aýrý men múgedektikten saqtaıdy. Vaktsınanyń arqasynda ınfektsııalarmen (dıfterııa, kókjótel, sirespe, polıomıelıt, qyzylsha, qyzamyq, V vırýstyq gepatıti, indetti parotıt) aýrýshańdylyqtyń birden tómendeýi Qazaqstanda ǵana emes, Eýropa memleketterinde de ımmýndaýdyń qajettigin umyttyra bastady. Immýndaýdan bas tartýdyń artýy biz umyta bastaǵan indetke alyp kelýi yqtımal.
Qazaqstan aýmaǵynda 2014 jylǵy Eýropalyq ımmýndaý aptalyǵy sharalarynyń negizgi baǵyty halyqtyń ımmýnoprofılaktıkaǵa qatysty senimin qalyptastyrý, ımmýnoprofılaktıka qaýipsizdigi týraly halyqty aqparattandyrý, ınfektsııalyq aýrýlarǵa qarsy qorǵanýdyń qajettiligi men qoǵam úshin ımmýndaýmen qamtýdyń jetkiliksizdiginiń saldary týraly halyqtyń, qoǵamnyń jáne medıtsına qyzmetkerleriniń habardarlyǵyn arttyrý; ekpe ótkizilmeýine ata-analar men medıtsına qyzmetkerleriniń nazar aýdaryp, vaktsınatsııadan bas tartýǵa baılanysty qaýip pen onyń saldaryna halyqtyń nazaryn aýdartý; ımmýnoprofılaktıka máselesine ákimshilik aýmaǵyndaǵy atqarýshy organdar basshylarynyń nazaryn aýdarýdy kózdeıdi.
«Jurtshylyq pen árbir qazaqstandyq óziniń jáne otbasynyń vaktsına jasatýy arqyly salaýatty bolashaq úshin eń jaqsy múmkindikti qamtamasyz etetinin túsinýi tıis», - delingen habarlamada.
