Qazaqstanda Eýropalyq odaq strategııalyq resýrs retinde tanyǵan 34 shıkizattyń 21-i bar
ASTANA. KAZINFORM – Qasym-Jomart Toqaev Qazaqstan-Germanııa bıznes forýmynda energetıka ınfraqurylymyn jańǵyrtý boıynsha birlesken jobalar tizimin jasaqtaýdy usyndy. Bul týraly Aqorda habarlady.
Memleket basshysy asa mańyzdy materıaldar salasyndaǵy yntymaqtastyqqa toqtaldy. Qazaqstanda Eýropalyq odaq strategııalyq resýrs retinde tanyǵan 34 shıkizat túriniń 21-i bar.
– Germanııaǵa senimdi jáne bir baǵytqa táýeldi bolmaıtyn shıkizat jetkizý joldary qajet. Al Qazaqstan qosylǵan quny joǵary ónim tizbegin qalyptastyrý úshin ınvestıtsııa men ozyq tehnologııaǵa múddeli. Osyǵan arqa súıep, myqty strategııalyq sınergııa jasaýǵa bolady. Geologııalyq barlaýdan jáne ken óndirýden bastap ony óńdeý jáne Qazaqstanda joǵary tehnologııalyq materıaldar shyǵarý satylaryn tolyq qamtıtyn iri jobalardy aıqyndaý yntymaqtastyqtyń kelesi kezeńi bolýǵa tıis, – dedi Qasym-Jomart Toqaev.
Prezıdenttiń pikirinshe, aýyl sharýashylyǵyndaǵy seriktestikti keńeıtýge aıtarlyqtaı áleýet bar.
– 2025 jyly aýyl sharýashylyǵy ónimderiniń alys-berisi 23 paıyzǵa ulǵaıǵan, al Qazaqstannan Germanııaǵa eksporttalatyn agrarlyq ónimder 38 paıyzǵa artqan. Endigi qadam – qosylǵan quny joǵary ónim shyǵarýdyń búkil tizbegi enetin ortaq jobalardy iske asyrý. ıAǵnı ǵylymı negizdegi egin sharýashylyǵy men sý únemdeıtin óndiristen bastap, ónimdi qaıta óńdeý, saqtaý jáne eksport satylary tolyq qamtylýǵa tıis, – dedi Memleket basshysy.
Birlesken jumystyń taǵy bir mańyzdy baǵyty – energetıka. Prezıdenttiń aıtýynsha, Qazaqstan Eýropaǵa munaı jetkizýshi elderdiń biri retinde energetıkalyq qaýipsizdikke eleýli úles qosyp keledi.
– Siemens Energy kompanııasymen yntymaqtastyǵymyz, sonyń ishinde KEGOC ulttyq elektr jelileriniń operatorymen birlese atqaryp jatqan jumysy bul baǵytta aıtarlyqtaı áleýet bar ekenin kórsetedi. Biz atalǵan saladaǵy seriktestik aıasyn keńeıtip, energetıka ınfraqurylymyn jańǵyrtý boıynsha birlesken jobalar tizimin jasaqtaýdy usynamyz. Eger atalǵan jobalar ekonomıkalyq turǵydan tıimdi bolsa, keıbir qural-jabdyqtardy syrttan ákelmeı, Qazaqstanda óndirgen jón. Naqty ınvestıtsııalyq jobany iske asyrý arqyly Ortalyq Azııa elderi naryǵyna shyǵýǵa bolady, – dedi Prezıdent.
Qasym-Jomart Toqaev eki eldiń qarym-qatynasyn Ortalyq Azııa men Eýropa arasyndaǵy ekonomıkalyq baılanystardy nyǵaıtatyn kópirge balady.
