Qazaqstanda Eýrazııalyq ekonomıkalyq komıssııaǵa qyzmetkerlerdi irikteý bastaldy
ASTANA. KAZINFORM – Eýrazııalyq ekonomıkalyq komıssııa qyzmetkerleriniń bos laýazymdaryna ornalasýǵa kandıdattardy biliktilik irikteýge qatysý úshin qujattardy qabyldaý bastaldy.
Qazaqstan Respýblıkasynyń Saýda jáne ıntegratsııa mınıstrligi 2026 jylǵy 5 aqpannan bastap biliktilik irikteýden ótý úshin kandıdattardyń qujattary men ótinishterin qabyldaý ashylatynyn habarlaıdy.
Qujattar men ótinishterdi qabyldaý 2026 jylǵy 31 naýryzǵa deıin júzege asyrylady.
Eýrazııalyq ekonomıkalyq komıssııa (budan ári - EEK) qyzmetkerleriniń bos laýazymdaryna ornalasýǵa kandıdattardy biliktilik irikteý Eýrazııalyq ekonomıkalyq komıssııa qyzmetkerleriniń bos laýazymdaryna ornalasýǵa kandıdattardy biliktilik irikteý qaǵıdalaryna sáıkes júrgiziledi (Qazaqstan Respýblıkasy Premer-Mınıstriniń orynbasary – Saýda jáne ıntegratsııa mınıstriniń 2022 jylǵy 4 shildedegi № 280-NQ Buıryǵymen bekitilgen).
Biliktilik irikteý EEK ótkizetin bos laýazymdarǵa ornalasýǵa konkýrstyq irikteýge qatysqysy keletin Qazaqstan Respýblıkasynyń azamattary qatarynan júzege asyrylady.
Konkýrsqa qatysýǵa 18 jasta tolǵan azamattar quqyly.
Biliktilik irikteýge qatysý úshin kandıdattar ýákiletti organǵa kelesi qujattardy usynady:
1) EEK qurylymdyq bólimsheleri (bólimsheleri) kórsetile otyryp, ol bos laýazymdarǵa ornalasýǵa úmitker bolatyn tegin, atyn, ákesiniń atyn (bar bolsa) qamtıtyn erkin nysandaǵy ótinish, poshtalyq mekenjaıy, elektrondyq poshta mekenjaıy, telefon nómiri;
2) pasporttyń nemese jeke kýáliktiń kóshirmesi;
3) biliktiligin rastaıtyn qujattardyń kóshirmeleri (kandıdattyń jumys (qyzmet) orny boıynsha notarıaldy nemese kadr qyzmetterimen kýálandyrylady):
bilim týraly, qosymsha kásiptik bilim týraly, ǵylymı dáreje, ǵylymı ataq berý týraly qujattar (bolǵan jaǵdaıda);
eńbek kitapshasy nemese eńbek qyzmetin rastaıtyn qujattar;
4) sottylyǵynyń joqtyǵy týraly anyqtama;
5) EEK resmı saıtynda jarııalanǵan format pen talaptarǵa sáıkes kandıdattyń 2 (eki) fotosýreti qosa berilgen saýalnamasy (1-qosymsha).
Qatysýshylar qujattar toptamasyn «Іrikteýge qatysý» belgisimen a.argyn@mti.gov.kz, a.sainov@mti.gov.kz elektrondyq mekenjaılarǵa jiberý qajet.
Bos laýazymdar týraly aqparat https://eec.eaeunion.org/comission/vacancies/ resmı saıtynda «Bos oryndar» bóliminde ornalastyrylǵan,
Úmitkerlerdi baǵalaý nysany – áńgimelesý.
Oń nátıje bergen jaǵdaıda kandıdatqa ýákiletti organnyń usynymy beriledi, ony keıinnen osy kandıdat EEK-ke usynady.
Ýákiletti organnyń usynymyn alý EEK-te bos laýazymǵa ornalasý konkýrsyna qatysý úshin mindetti rásim bolyp tabylmaıdy, biraq konkýrstan ótý kezinde usynymy bar kandıdattarǵa artyqshylyq beriledi.
EEK qyzmetkerleriniń bos laýazymdaryna ornalasýǵa biliktilik irikteý nátıjeleri Qazaqstan Respýblıkasy Saýda jáne ıntegratsııa mınıstrliginiń ınternet – resýrsynda jarııalanady.
Eske sala keteıik, osyǵan deıin Senat qandastarǵa áleýmettik qoldaý kórsetetin qujatty maquldaǵanyn habarlaǵan edik.