Qazaqstanda Eýrazııa sáýletshiler akademııasyn qurý usynyldy

ASTANA. QazAqparat - Astanada ótken Halyqaralyq sáýletshiler kongresinde Eýrazııa sáýletshiler akademııasyn qurý bastamasy kóterildi, dep habarlaıdy QazAqparat tilshisi.

Bul týraly Qazaqstan sáýletshiler odaǵynyń prezıdenti Serik Rústembekov halyqaralyq kongress qorytyndysyna arnalǵan baspasóz máslıhatynda aıtty.

«Halyqaralyq kongress barysynda Eýrazııa sáýletshileriniń úzdik shyǵarmashylyq ıdeıalaryn biriktiretin Eýrazııa sáýletshiler akademııasyn qurý usynyldy. Eýrazııalyq ıdeıany bizdiń Prezıdentimiz usynyp, Eýrazııalyq ekonomıkalyq odaqtyń qurylýynda kóp eńbek atqarǵan bolatyn. Sáýletshiler de bul protsestiń bólshegi retinde óz akademııasyn qurǵysy keledi», - dedi Serik Rústembekov QR Mádenıet jáne sport mınıstrligindegi jıynda.

Onyń aıtýynsha, Kongress qatysýshylarynyń basym bóligi Eýrazııa sáýletshiler akademııasynyń Astanada ornalasýy qajettigin aıtqan. Alaıda, ǵımarattyń ornalasýy týraly naqty sheshim áli qabyldanǵan joq. S. Rústembekovtyń aıtýynsha, akademııa qurylymy týraly da keńester usynylǵan.

«Akademııa qandaı bolýy qajet degen taqyrypta pikirtalas júrdi. Árıne, onyń zamanaýı bolǵanyn qalaımyz, qurylymy pıramıda tárizdi ıerarhııalyq emes, tutas Eýrazııa keńistiginde qarqyndy damıtyn qalyptamalyq júıe (matrıchnaıa sıstema) bolǵanyn qalaımyz. Onda pikirler men jańa jobalar almastyrylyp, kórmeler ótýi kerek. ıAǵnı, bizdiń mádenıetimizdi damytyp, sáýlettegi aǵa býyn men kishi býyn arasyndaǵy alshaqtyqty joıýǵa múmkindik beredi», - dep óz sózin tolyqtyrdy S. Rústembekov.

Aıta keteıik, halyqaralyq sáýletshiler kongresi 16 shilde kúni Astanada ótti. Oǵan Taıaý jáne Qıyr Shyǵys sáýletshileri, Qazaqstan óńirleriniń sáýletshileri qatysty.