Qazaqstanda etti mal sharýashylyǵyn damytýǵa arnalǵan forým ótedi
ASTANA. KAZINFORM - Memleket basshysynyń tapsyrmasy boıynsha QR Aýyl sharýashylyǵy mınıstrligi ónimdilikti arttyrýǵa, qaıta óńdeýdi damytýǵa jáne eksporttyq áleýetti keńeıtýge baǵyttalǵan mal sharýashylyǵyn damytýdyń keshendi josparyn ázirledi.
Mınıstrliktiń baspasóz qyzmetiniń habarlaýynsha, qujat etti mal sharýashylyǵyn júıeli damytýǵa, naryq qatysýshylary arasyndaǵy ózara yqpaldastyqty kúsheıtýge jáne básekege qabiletti ónimdi syrtqy naryqtarǵa shyǵarý úshin qolaıly jaǵdaı jasaýǵa arnalǵan.
Oǵan qajetti alǵysharttar jetkilikti. Bizdiń elimiz iri qara maldyń kóptigi men negizgi ótkizý naryqtaryna jedel logıstıkany qamtamasyz etetin tıimdi geografııalyq ornalasýynyń arqasynda et óndirisin damytýda eleýli áleýetke ıe. Ony barynsha tıimdi paıdalaný qaıta óńdeýdi jetildirýdi, óndiris tıimdiligin arttyrýdy, zamanaýı standarttardy engizýdi jáne sala qatysýshylary arasyndaǵy yntymaqtastyqty nyǵaıtýdy talap etedi.
Bul máselege ýákiletti memlekettik organdar basa nazar aýdaryp keledi.
Osy oraıda bıyl 14–15 aqpanda ótetin Dala.Camp Forum 2026 aıasynda osy taqyryp jan-jaqty talqylanady.
Forým «Qazaqstannyń et ındýstrııasyndaǵy iri qara: Bolashaqtyń jol kartasy» taqyrybymen ótedi. Oǵan memlekettik organdardyń, agrobıznes qurylymdarynyń, salalyq qaýymdastyqtardyń ókilderi, ınvestorlar men sarapshylar qatysady.
Forýmǵa Qazaqstannan, Ortalyq Azııa elderinen, Amerıka Qurama Shtattarynan, Brazılııadan, Eýropa memleketterinen, Birikken Arab Ámirlikterinen jáne Túrkııadan 150 delegattyń qatysýy josparlanǵan. Olardyń qatarynda Janýarlar densaýlyǵy jónindegi dúnıejúzilik uıym, Azyq-túlik qaýipsizdigi jónindegi ıslam uıymy, Qazaqstan mal ósirýshiler odaǵy, tuqymdyq baǵyttaǵy salalyq palatalar, Qazaqstan Investment Corporation, iGPS jáne agroónerkásip keshenindegi iri kompanııalar bar.
Forýmnyń alǵashqy kúni Qazaqstannyń jahandyq et naryǵyndaǵy orny, eksporttyq basymdyqtar, memlekettik qoldaý tetikteri, halyqaralyq veterınarııalyq talaptar jáne ınvestıtsııalyq múmkindikter qarastyrylady. Kelesi kúni sharýashylyqtardyń tıimdiligin arttyrý, qarjylyq modeldeý, tsıfrlandyrý jáne aýyl sharýashylyǵy taýar óndirýshileriniń basqarýshylyq quzyretterin damytý máseleleri talqylanady.
Forým baǵdarlamasy aıasynda mal sharýashylyǵy men oǵan jaqyn salalardaǵy ınvestıtsııalyq jobalardyń tanystyrylym sessııasy bolady dep josparlanǵan.
Osyǵan deıin Qazaqstannyń mal sharýashylyǵy ónimin 42 elge jetkize alatyny týraly jazdyq.