Qazaqstanda et ónimderi nege qymbattap ketti

NUR-SULTAN. QazAqparat – Qazaqstanda et ónimderin tutyný jylyna 7%-ǵa artqan. Ortasha eseppen bir qazaqstandyq azamat 21 keli et jegen, dep habarlaıdy QazAqparat Energyprom.kz portalyna silteme jasap.

2020 jyldyń úshinshi toqsanynda ár qazaqstandyq ortasha eseppen 21,3 keli et jáne et ónimin tutynǵan. Bul 2020 jyldyń ekinshi toqsanymen salystyrǵanda 1 kelige artyq, al 2019 jyldyń úshinshi toqsanymen salystyrsaq 1,4 kelige kóp.

2020 jyldyń úshinshi toqsanynda et pen et ónimderiniń barlyq túrin tutyný artqan. Ár qazaqstandyq sıyr etin (5,7 kg, − 0,2 kg), et týramasyn (2,4 kg, + 0,2 kg) jáne qoı etin (1,9 kg, + 0,2 kg) kóbirek satyp alǵan.

Etti paıdalaný Qazaqstannyń barlyq óńirinde artty. Etti eń qatty jaqsy kóretin Qaraǵandy oblysynyń turǵyndary bolyp shyqty, onda ár turǵyn ortasha eseppen 26,8 keli et jegen. Odan keıingi oryndarda Aqmola oblysy (25,4 kg) men Almaty (25,2 kg) tur.

Etti tutyný 2020 jyldyń úshinshi toqsanynda Qaraǵandy oblysy (+3,3 kg), Nur-Sultan (+2,7 kg) jáne Jambyl oblysynda (+2,3 kg) artqan.

Etke suranys kóbeıgendikten elde et baǵasy da aıtarlyqtaı ósken. Et pen et ónimderiniń barlyq túri qymbattady. Al taýyq eti kerisinshe jylyna 5%-ǵa, kelisine 789 teńgege deıin arzandaǵan.

Jyl ishinde eń qatty qymbattaǵan qoı eti eken: birden 16,2%-ǵa, kelisine 1990,3 teńgege deıin. Jylqy etiniń de baǵasy óskeni baıqalady: 11,9%-ǵa, kelisine 2271,8 teńgege. Qazaqstandyqtar arasynda tanymal sıyr eti 8%-ǵa, kelisine 1947,4 teńgege qymbattady.