Qazaqstanda et qory jetkilikti – AShM

NUR-SULTAN. QazAqparat - 2020 jyldyń sońyna qaraı Qazaqstanda et óndirý kólemi tutyný deńgeıine deıin jetkizildi. Qazir naryqta kópten kútken et ónimderine suranys pen usynystyń tepe-teńdigi qalyptasty, dep habarlaıdy QazAqparat.

Aýyl sharýashylyǵy mınıstrliginiń málimetinshe, ótken jyly respýblıkada 931,4 myń tonna et ( 2019 jylǵa qaraǵanda 3,7% artyq ), onyń ishinde 521,3 myń tonna sıyr eti, 172,3 myń tonna qoı eti jáne 143 myń tonnaǵa jýyq jylqy eti óndirildi.

Osylaısha, qazirgi ýaqytta otandyq óndiris esebinen ishki naryq sıyr etimen – 97%-ǵa, qoı etimen – 100%, jylqy etimen – 98%-ǵa qamtamasyz etilgen.

Búginde respýblıka boıynsha sıyr etiniń qory – 16,5 myń tonnany, qoı etiniń qory – 7,8 myń tonnany, jylqy etiniń qory – 7,3 myń tonnany quraıdy.

Óńirlerdegi qoımalar únemi tolyqtyrylyp otyrady, sondyqtan elimizde et tapshylyǵy kútilmeıdi.

Sondaı-aq, Qazaqstanda mal sany jetkilikti. Elimizde mal basy jyl saıyn turaqty ósimdi kórsetýde.

Buǵan mal ósirýshilerge degen memlekettik qoldaý sharalarynyń artýy, sondaı-aq ótken jyly QR Aýyl sharýashylyǵy mınıstrligi tiri maldy eksporttaýǵa engizgen moratorıi yqpal etti.

2020 jyly sharýashylyqtardyń barlyq sanattarynda jylqy sany 9,3%-ǵa ( 3 mln 118,3 myń basqa deıin ), ІQM – 5,5%-ǵa ( 7 mln 848,5 myńǵa deıin ), túıe – 5%-ǵa ( 227,2 myńǵa deıin ), shoshqa – 0,8%-ǵa ( 819,9 myńǵa deıin ), qoı – 4,9%-ǵa ( 17,7 mln-ǵa deıin ), eshki – 2,8%-ǵa ( 2 mln 305,6 myńǵa deıin ) ulǵaıdy.

Osyǵan baılanysty et baǵasynyń ósýi óndiristiń nemese mal basynyń jetispeýshiligine baılanysty emes.

Naryqtyq ekonomıka jaǵdaıynda aýyl sharýashylyǵy ónimine jáne taýarlardyń basqa túrlerine baǵany kásipkerler óndiris, saqtaý, tasymaldaý kezinde jumsaǵan shyǵyndardy eskere otyryp, suranys pen usynys negizinde derbes belgileıtinin atap ótý qajet.

Sonymen qatar, baǵaǵa syrtqy faktor – kórshi elder men halyqaralyq naryqtardaǵy uqsas ónimder baǵasynyń ózgerýi de áser etedi.