Qazaqstanda et eksportyna tyıym salynýy kerek pe – mınıstr jaýaby

NUR-SULTAN. QazAqparat – Saýda jáne ıntegratsııalar mınıstri Baqyt Sultanov et ónimderin eksporttaý kórsetkishterin baıandady, dep habarlaıdy QazAqparat.

«2020 jyly iri qara mal eti 9 mln dollarǵa eksporttaldy, jalpy kólemi – 2,7 myń tonna. Jyl basynan bergi 4 aıda eksport kólemi 9,4 mln dollarǵa 2,6 myń tonna etti qurady. Import kólemi byltyr 4 aıda 35 mln dollar bolsa, bıyl 21 mln dollardy quraǵan, ıaǵnı 41% tómendedi. Bul kórsetkishter eksport kólemi artyp, ımport kólemi azaıyp jatqanyn kórsetedi», - dedi Saýda mınıstri Ortalyq kommýnıkatsııalar qyzmetinde ótken baspasóz máslıhatynda.

Sonymen birge, mınıstr «Qýańshylyqtan keıin kúzde et tapshylyǵy bolmaýy úshin mınıstrlik ne istep jatyr?» degen suraqqa jaýap berdi.

«Árıne, et bolsyn, basqa ónim bolsyn, óndirý kólemi eń birinshi óz halqymyzdy qamtamasyz etýi kerek. Ári qaraı eksportqa múmkindik bolsa, ony da qoldaýymyz kerek. Óıtkeni, bul valıýtalyq kiris bolady, sharýalarǵa, fermerlerge jaqsy tabys alyp keledi. Óz elimizde et kólemi nemese basqa da taýar tapshylyǵy bolsa, eksportty shekteıtin arnaıy ınstrýment qarastyrylǵan. Ol úshin vedomstvoaralyq komıssııa qurylǵan, olar tapshylyq baıqalǵan kezde tıisti sheshim qabyldaıtyn bolady», - dep túsindirdi B. Sultanov.