Elimizde esirtkimen baılanysty qylmys sany 2,8% ósken

ASTANA. KAZINFORM – Іshki ister mınıstrligi Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov ortalyq kommýnıkatsııalar qyzmetinde ótip jatqan baspasóz máslıhatynda 8 aıda esirtki qylmystarynyń sany 2,8% artqanyn aıtty.

- Onyń ishinde aınalymǵa shyǵarylatyn sıntetıkalyq esirtkiniń kólemi úsh ese artty (372 kg-nan 1,1 tonnaǵa deıin). 7 mıllıonnan astam doza esirtki zańsyz aınalymǵa jiberilmedi. 105 jasyryn esirtki zerthanasy joıyldy (2024 jyly – 43), olardyń 12-si (2024 j. – 28) sıntetıkalyq esirtki óndirýmen, al 93-i fıtozerthana bolǵan. Jalpy 24 myń tonnaǵa jýyq prekýrsorlar tárkilendi, - dedi komıtet ókili.

Sondaı-aq, ol jyl basynan beri esirtki tasymalynyń 114 óńiraralyq arnasy anyqtalyp, 2 halyqaralyq arna jabylǵanyn atap ótti.

- Uıymdasqan qylmystyq toptarǵa qatysty 26 qylmystyq is qozǵaldy (2024 j. – 11). Olardyń olardyń beseýi transulttyq deńgeıde (2024 j. – 2), - dedi Qýandyq Áljanov.

Buǵan deıin ІІM jyl basynan beri zańsyz aınalymnan 11 tonnadan asa esirtki alynǵanyn málim etken bolatyn.