Qazaqstanda esirtki qylmysyna qatysy bar 69 jasóspirim ustaldy
ASTANA. KAZINFORM – Qazaqstanda esirtki qylmystaryn jasaǵany úshin 69 jasóspirim ustaldy, dep habarlaıdy Polisia.kz.
Іshki ister mınıstrligi kámeletke tolmaǵandardyń ata-analary men zańdy ókilderine, sondaı-aq stýdentter men jeke kásippen aınalysyp júrgen jastarǵa úndeý joldady.
Jańa oqý jylynyń bastalýymen polıtsııa qyzmetkerleri elimizdiń barlyq mektepteri men oqý oryndaryn profılaktıkalyq is-sharalarmen qamtyǵan. Jalpy 16 myńnan astam profılaktıkalyq is-shara ótkizilse, onyń 5 myńnan astamy tájirıbeli ustazdar, psıhologtar jáne narkolog-dárigerlerdiń qatysýymen uıymdastyrylǵan.
Búginde elimizde esirtki qylmystary úshin 69 jasóspirim ustalǵan. Onyń 40-y esirtki ótkizgeni, 27-si asa iri mólsherde saqtaǵany, taǵy ekeýi esirtkini jarnamalaǵany jáne nasıhattaǵany úshin ustaldy. Olardyń 52-si ul, 17-si qyz.
– Qurmetti ata-analar men zańdy ókilder! Sizderdi mynadaı belgiler erekshe alańdatýy tıis: balanyń qolynda aqshanyń nemese qymbat zattardyń kenetten paıda bolýy, telefon men hat almasýdy jasyrýy, ártúrli kúmándi skrınshottar. Qosymsha tabys belgileri – orama qaltashalar, shaǵyn paketter, oqshaýlaǵysh taspa, elektrondyq tarazylar jáne basqa da kúmándi zattar, – dedi ІІM Esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Onyń aıtýynsha, ata-analar jasóspirimniń aralasatyn ortasyna, bos ýaqytyn qalaı ótkizetinine, áleýmettik jelilerde qandaı akkaýnttarǵa tirkelgenine jáne messendjerlerde kimdermen baılanys ornatqanyna erekshe nazar aýdarýy qajet.
ІІM esirtki qylmystaryn jasaǵany úshin qylmystyq jaýaptylyq 16 jastan bastalatynyn eske saldy. Vedomstvo ata-analardy balalardyń quqyqtyq tárbıesine belsendi qatysýǵa shaqyrdy.
Aıta keteıik, Astanada esirtki satatyn ınternet-dúken «qoımasynan» 2 myńnan astam túıinshek tárkilendi.
