Qazaqstanda esirtki bıznesine qarsy kúres kúsheıdi: 14 tonnadan astam esirtki tárkilendi
ASTANA. KAZINFORM – Memleket basshysynyń tapsyrmasyna sáıkes, elimizde esirtki qylmysyna qarsy kúres sharalary kúsheıtilip, nátıjesinde qylmystyq toptar men astyrtyn zerthanalardyń joly kesildi. Bul týraly Bas prokýratýrada ótken vedomstvoaralyq keńeste málim boldy.
Qabyldanǵan sharalardyń nátıjeleri:
- Esirtki ótkizý faktileri 16%-ǵa artyp, 1637 qylmys tirkeldi (2024 jyly – 1407);
- 14 qylmystyq toptyń, onyń ishinde 2 transulttyq toptyń qyzmeti toqtatyldy;
- 14 tonnadan astam esirtki tárkilendi;
- 21 astyrtyn esirtki zerthanasy joıyldy;
- 35 myńnan astam graffıtı-jarnama óshirilip, 22 jarnama taratýshy ustaldy;
- 22 myń krıpto ámııan anyqtalyp, 18 mln AQSh dollary kólemindegi tsıfrlyq aktıv tárkilendi;
- Esirtki isteri boıynsha 10 mlrd teńgeniń múlki tárkilendi.
Máselen, Almaty oblysy Nura aýylynda bıyl mamyr aıynda joıylǵan zerthanadan 8 tonna prekýrsor men 100 keliden astam daıyn esirtki tabylǵan.
Al Pavlodarda prokýrorlar energııany kóp tutynatyn páterdi anyqtap, onda «kannabıs» ósirgen azamattyń áreketine tosqaýyl qoıdy.
Budan bólek, ІІM men Qarjylyq monıtorıng agenttigi arasyndaǵy memorandým aıasynda 50 vedomstvoaralyq jedel-tergeý top quryldy. Qazirgi tańda birneshe kúrdeli is arnaıy prokýrorlardyń óndirisine qabyldanǵan.
Keńes qorytyndysy boıynsha qylmystyq qýdalaý organdaryna esirtki zerthanalaryn anyqtaý, qylmystyq toptardy áshkereleý jáne esirtki dúkenderin uıymdastyrýshylardyń qyzmetin tereń qarjylyq tergeý arqyly áshkereleý tapsyryldy.
Aıta keteıik, búgin Túrkistan oblysynda iri esirtki plantatsııasy anyqtalyp, myńnan asa ósimdik tárkilendi.