Qazaqstanda esirtki bıznesin uıymdastyrýshylardyń ishinde qaı el azamattarynyń úlesi basym

ASTANA. KAZINFORM — Іshki ister mınıstriniń orynbasary Sanjar Mádıev Qazaqstanǵa 72 tonna esirtki hımıkatyn ákelýdi uıymdastyrǵan reseılik týraly pikir bildirdi.

Senat otyrysynan keıingi baspasóz máslıhatynda Sanjar Mádıevke eldegi esirtki bıznesindegi reseılikterdiń úlesi týraly suraq qoıyldy.

— Jýyqta ǵana Ýkraınadaǵy soǵys bastalǵanda Qazaqstanǵa qashqan reseıliktiń isi boıynsha sot sheshimi shyqty. 72 tonna esirtki hımıkatyn tasymaldaýdy uıymdastyrǵan kúdikti 10 jylǵa sottaldy. Esirtki qylmysy boıynsha qýdalaý orbıtasyna tartylǵan azamattardyń ishinde reseılik relokanttardyń úlesi neshe paıyz — dep surady jýrnalıst. 

Vıtse-mınıstr suraqqa jalpylama jaýap berdi.

— Qazirgi tańda shetel azamattarynyń esirtki qylmystaryna aralasqany týraly biraz faktiler dáleldendi. Eki transulttyq uıymdasqan qylmystyq topqa qarsy qylmystyq isterdi tergep jatyrmyz. Onyń ishinde Reseı, Ýkraına jáne Tájikstan azamattary bar. Zań boıynsha sizge onyń mán-jaıyn tolyq aqparat bere almaımyn. Biraq osyndaı úlken problema bar ekenin aıtý kerek, — dedi vıtse-mınıstr.

Sondaı-aq, Sanjar Mádıev el aýmaǵynda 92 esirtki zerthanasy áshkerelenip, 18 tonnadan astam esirtki tárkilengenin aıtty.

Eske salsaq, buǵan deıin esirtki bıznesin uıymdastyrǵandar ómir boıyna bostandyǵynan aıyrylatyny habarlandy.