Qazaqstanda eski kólikti qaıta kádege jaratý zaýyty iske qosylady
ASTANA. QazAqparat - Jarty jyldan keıin qazaqstandyqtar eski kólikterin ýtılızatsııaǵa tapsyra alady, ıaǵnı, dál jarty jyldan keıin Qazaqstanda eski kólikti qaıta kádege jaratatyn alǵashqy zaýyt iske qosylady. Bul týraly búgin Ortalyq kommýnıkatsııalar qyzmetiniń brıfıngine qatysa otyryp, Investıtsııalar jáne damý vıtse-mınıstri Albert Raý málim etti, dep habarlaıdy QazAqparat.
«Eski kólikterdi qaıta kádege jaratatyn zaýyt toqtap tur degen málimdemeni men aıtqan joqpyn, - dedi vıtse-mınıstr jýrnalısterdiń «Úkimet zaýyt qurylysyn keıinge shegergeni shyn ba?» degen suraǵyna jaýap bere otyryp. - Qazir meniń bilýimshe, konkýrstyq protsedýralar júrip jatyr, keshegi qolda bar aqparatqa súıensem, alǵashqy zaýyt alty aıdan keıin iske qosylady.
A.Raýdyń aıtýynsha, Qazaqstan eski kólikterdi qaıta kádege jaratatyn zaýyttyń keminde úsheýin salýdy josparlap otyr. Onyń aıtýynsha, ýtılızatsııa jasaıtyn birinshi zaýyt Astanada, ekinshisi Qaraǵandyda, úshinshisi Almaty nemese Shymkent qalasynda salynbaq.
«Ary qaraı, bul is aınalyp ketse, onda árbir oblys úshin eski kólikterdi qabyldaıtyn bir pýnkt ashamyz», - dedi A.Raý.
