Qazaqstanda eski kólikterdi qabyldaý boıynsha 2019 jylǵa arnalǵan kvota kólemi bekitildi
QR Energetıka mınıstrligi eski kólikterdi joıýǵa qabyldaý baǵdarlamasy boıynsha 2019 jylǵa arnalǵan kvota kólemin bekitti. ÓKM (óndirýshilerdiń keńeıtilgen mindettemeleri) operatoryna kólikterdi aqshaǵa jáne sertıfıkat berý baǵdarlamasy boıynsha qabyldaýǵa bıyl 50 myń kvota bólingen. Sonyń 25 myńy jeńildik sertıfıkaty baǵdarlamasyna bólinse, qalǵan 25 myńy aqshalaı ótemaqy baǵdarlamasyna qarastyrylyp otyr. Sonymen qatar, júk kólikterine beriletin sertıfıkat quny bıyl ulǵaıtyldy. Byltyr onyń quny 450-650 myń teńge bolsa, osy jyldan bastap onyń kólemi 550-den 750 myń teńgege deıin kóterildi. Al jeńil avtokólik sertıfıkatynyń quny baıaǵy 315 teńge qalpynda qaldy.
Eski kólikterdi qabyldaý baǵdarlamasy 20 aqpanynan bastap jalǵasyn tabady.
«Baǵdarlama talaby boıynsha joıýǵa tapsyrylatyn kólikter tolyq jıyntyqta qabyldanady. Eski tehnıkany ótkizýshige jeńildik sertıfıkaty beriledi. Otandyq avtoóndirýshiden kólik satyp alǵan kezde sertıfıkat somasy kólik baǵasynan shegerilip qalady. Jeńildik sertıfıkattyń quny tapsyrylatyn kólik quralynyń sanatyna baılanysty baǵalanady. Baǵdarlama boıynsha otandyq óndirýshiden kez kelgen sanattaǵy kólik quralyn sertıfıkat arqyly alýǵa bolady. Sondaı-aq, avtokólik satyp alǵanda 2 sertıfıkatty biriktirý múmkindigi qarastyrylǵan. Jeńildik sertıfıkaty ataýly jáne ony ózgeniń atyna tirkeý eki retten artyq júrgizilmeıdi. Sondaı-aq, ony qaıtaryp berýge nemese qolma qol aqshaǵa aýystyrylmaıdy. Sertıfıkat tirkelgen kúnnen bastap 12 aıǵa jaramdy», - delingen mınıstrliktiń habarlamasynda.
Jeńildik sertıfıkat baǵdarlamasy boıynsha qandaı kólik satyp alýǵa bolatyndyǵy týraly málimetti avtoóndirýshilerdiń resmı saıtynan («BIPEK AVTO» www.bipek.kz, www.aziaavto.kz. www.sap.com.kz, www.hyundai-hta.kz, www.daewoobus.kz, www.kamazkamaz.kz) kórýge bolady.
Aıta ketsek, jeńildik sertıfıkaty baǵdarlamasy Qazaqstanda 2017 jyldyń 26 maýsymynda iske qosylǵan bolatyn. Osy aralyqta qazaqstandyqtar atalǵan baǵdarlama boıynsha 20 939 kóligin sertıfıkatqa almastyrǵan. Sondaı-aq, satyp alý baǵdarlamasy boıynsha 67 052 jeńil kólik qabyldandy. Eski kóligen tapsyrǵan qazaqstandyqtarǵa 10 mlrd 48 mln teńge kóleminde qarajat aýdaryldy. Qos baǵdarlamanyń qorytyndysy boıynsha ÓKM Operatory 88 myńǵa jýyq eski kólik qabyldady.
