Qazaqstanda eski kólikter ýtılızatsııaǵa ýaqytsha qabyldanbaıdy
NUR-SULTAN. QazAqparat – Qazaqstanda 24 jeltoqsannan bastap eski kólikter ýtılızatsııaǵa ýaqytsha qabyldanbaıdy, dep habarlaıdy QazAqparat ROP operatorynyń baspasóz qyzmetine silteme jasap.
«Qoldanystan shyǵyp qalǵan tehnıkany ýtılızatsııaǵa qabyldaýdyń 40 myń danalyq jyldyq jospary oryndalyp qoıǵandyqtan, eski avtokólikterdiń qabyldaý beketteriniń jumysyna ózgeris engizilgenin habarlaımyz. 2020 jylǵy 23 jeltoqsannan bastap Qazaqstannyń 17 óńirindegi qabyldaý beketteri eskirgen jeńil, jolaýshylar jáne júk kólikterin qabyldaý jumysyn toqtatady. Avtokólik ıelerinen ótinim elektrondy kezekke sáıkes saǵat 17.00-ge deıin qabyldanady», - delingen resmı aqparatta.
2020 jylǵy jeltoqsannyń 24-nen 31-ne deıin qabyldaý beketterinde tehnıkalardy presteý jáne tasymaldaý, olardy Qaraǵandyǵa jetkizý jumystary júrgiziledi. Sonymen qatar operator qoldanystan shyǵyp qalǵan, ózdiginen júretin aýyl sharýashylyǵy tehnıkalaryn qabyldaý kvotasy oryndalyp qoıǵanyn habarlaıdy. 5 qarasha men 15 jeltoqsan aralyǵynda ýtılızatsııaǵa 100 traktor men 20 kombaın qabyldanǵan.
«Eski tehnıkalardy ótkizý úshin halyqty yntalandyrý jumysy kelesi jyly jalǵasady. Qoldanystan shyǵyp qalǵan tehnıkalardy 2021 jyly qabyldaý baǵdarlamasy týraly qosymsha aqparat aldaǵy ýaqytta taratylady», - delingen habarlamada.
