Qazaqstanda eski avtokólikterdiń sany 3 paıyzǵa ósti
ASTANA. QazAqparat - Qazaqstanda jeńil avtokólikterdiń sany 0,6 paıyzǵa azaıyp, 2018 jyldyń mamyr aıyndaǵy kórsetkish boıynsha 3,8 mıllıon bolǵan. Sondaı-aq, 7-10 jyl buryn shyqqan avtokólikterdiń sany 13,3 paıyzǵa (290 myń) kemise, paıdalanǵanyna 3 jyl bolǵan kólikterdiń sany 12,8 paıyzǵa (520,9 myń) tómendegen. Mundaı statıstıkany Ranking.kz keltiredi, dep habarlaıdy QazAqparat tilshisi.
Aıta keterligi, qoldanysta bolǵanyna 3-7 jyl bolǵan jeńil avtokólikterdiń sany 12,2 paıyzǵa kóbeıip, 471,5 myń danaǵa jetken. Sonymen birge, 10 jyldan astam paıdalanylǵan avtokólikterdiń sany 4,1 paıyzǵa artyp, 2,4 mıllıon danany quraǵan.
Jeńil avtokólikterdiń sany jaǵynan osy jyldyń mamyn aıyndaǵy kórsetkish boıynsha qazirgi Túrkistan oblysy men Shymkent qalasy kósh bastap tur. Ol óńirde 482 myń jeńil avtokólik bar. Atap óterligi, atalǵan aımaqta jasy 10 jyldan asyp ketken avtokólikterdiń úlesi 69,4 paıyzdy quraıdy.
Odan keıingi orynda 473,1 myń avtokóligimen Almaty oblysy tur. Ol jerde paıdalanǵanyna on jyldan astam ýaqyt ótip ketken kólikterdiń úlesi 77,5 paıyzǵa jetken. Almaty oblysy eski kólikterdiń sany jaǵynan respýblıkada Jambyl oblysynan (ol jerde 81,3 paıyz) ǵana qalyp tur.
Kólikterdiń sany jaǵynan úshtikti Almaty qalasy túıindeıdi. Ol jerde 10 jyldan astam paıdalanylǵan kólikterdiń úlesi 49,7 paıyzdy quraıdy.
