Qazaqstanda eski avtobýstardy paıdalanýǵa shekteý qoıylýy múmkin
Jol kartasy jobasyn QR Іshki ister mınıstrligi men QR Indýstrııa jáne ınfraqurylymdyq damý mınıstrligi birlesip jasaǵan.
«Jobada zańnamalyq jáne uıymdastyrý-tájirıbelik sıpattaǵy birqatar keshendi sharalar qarastyrylǵan. Máselen, eski avtobýstardy paıdalanýǵa shekteý qoıý máselesi bar. Qazaqstanda 90 myńnan astam avtobýs tirkelgen, onyń teń jartysynan astamynyń paıdalaný merzimi 15 jyldan asyp ketken. Bul arqyly avtobýs parki jańarady dep úmittenemiz. Tasymaldaýshy avtobýs júrgizýshilerine qoıylatyn biliktilik talaptary kúsheıedi», - dedi QR ІІM Ákimshilik polıtsııa komıtetiniń tóraǵasy Maqsat Baıbolov elordada ótken brıfıngte.
Sonymen birge, avtobýsty qaıta jasaqtaýǵa tyıym salynady. Ózge kóliktermen salystyrǵanda, avtobýs qaýipti kólik sanalady. Oǵan kóbirek jolaýshy syıatyndyqtan, apat qurbandarynyń da kóp bolýy yqtımal.
«Eldimekenderde avtobýs jyldamdyǵyn 50 km/saǵatqa deıin, qala syrtyndaǵy jolda - 80 km-saǵatqa deıin tómendetý qarastyrylýda. Qazirgi jol qozǵalysy erejelerinde eldimekenderdegi avtobýs jyldamdyǵy 60 km/saǵat, qala syrtynda - 90 km/saǵat bolyp bekitilgen. Erejeniń buzylýyn avtomatty tirkeý júıesin keńeıtýdi de usynamyz», - dedi komıtet basshysy.
Jobada jol ınfraqurylymyn damytý, ásirese jol belgilerin, jaıaý júrginshiler belgisin jańartý usynylǵan. Jol qaýipsizdigi týraly úgit-nasıhat jumystary da mańyzdy. Áleýmettik jelilerge beınerolıkterdi kóbirek taratý qajet.
M. Baıbolovtyń aıtýynsha, jol kartasy jobasy bıylǵy maýsym aıynda qabyldanýy múmkin.