Qazaqstanda eshkim kásibı qyzmeti úshin qýdalaýǵa ushyramaıdy — Aıda Balaeva
ASTANA. KAZINFORM – Premer-mınıstrdiń orynbasary — Mádenıet jáne aqparat mınıstri Aıda Balaeva sońǵy kúnderi Qazaqstanda keıbir qylmystyq isterge halyqaralyq nazar aýdartý maqsatynda «azaptaý» týraly negizsiz aqparattar ádeıi taratylyp jatqanyn aıtty. Bul týraly ol áleýmettik jelidegi paraqshasynda jazdy.
— Búgin Human Rights Watch halyqaralyq uıymy «Qazaqstanda jýrnalısterge qysym kórsetýdi toqtatýǵa» shaqyrdy. Alaıda bul úndeý naqty jaǵdaıdy tolyq bilmeýden týyndaǵany anyq. Sońǵy kúnderi Qazaqstanda keıbir qylmystyq isterge halyqaralyq nazar aýdartý maqsatynda «azaptaý» týraly negizsiz aqparattar ádeıi taratylyp jatyr. Atalǵan ister boıynsha jaýapkershilikke tartylǵandardyń arasynda medıa salasynyń ókilderi de bar, — dep jazdy Aıda Balaeva.
2022 jyldan bastap elimizde medıa jáne aqparat salasyndaǵy zańnamany jetildirýge baǵyttalǵan júıeli reformalar júzege asyp keledi.
— Bul ózgerister jýrnalısterdiń kásibı mártebesin kóterýge jáne olardyń quqyqtyq turǵyda qorǵalýyna baǵyttalǵan.Soǵan qaramastan, keıingi ýaqytta aqparattyq keńistikte jýrnalıster men BAQ-qa «júıeli qysym kórsetilip jatyr» degen málimdemeler jıi aıtylyp jatyr. Keıbir qylmystyq isterdiń fıgýranttary men olardyń qorǵaýshylary tergeý barysynda azaptaý bolǵany týraly aıyp taǵyp júr. Osyndaı dálelsiz málimdemeler qoǵamdy da, sheteldik quqyq qorǵaý uıymdaryn da jańsaq pikirge jetelep otyr, — dedi ol.
Mınıstr adam quqyqtarynyń buzylýy týraly kez kelgen tujyrym naqty faktilerge negizdelýge tıis ekenin atap ótti.
— Adam quqyqtarynyń buzylýy týraly kez kelgen tujyrym naqty faktilerge, dálelderge jáne zań talaptaryna negizdelýge tıis. Emotsııaǵa nemese qoǵam nazaryn aýdarýǵa baǵyttalǵan áreketterge jol berilmeýi kerek. Memleket sóz bostandyǵy men BAQ erkindigin Qazaqstan Respýblıkasynyń Konstıtýtsııasynda jáne halyqaralyq mindettemelerde bekitilgen negizgi qundylyqtar retinde ustanady. Degenmen, sóz erkindigi zań talaptaryn elemeýge nemese jaýapkershilikten jaltarýǵa múmkindik bermeıdi. Bul qaǵıda barlyq quqyqtyq memleketterge ortaq, — dedi Aıda Balaeva.
Jýrnalısterdiń qyzmetine, BAQ jumysyna nemese naqty qylmystyq isterge qatysty barlyq másele zań aıasynda, protsessýaldyq normalar tolyq saqtala otyryp, kinásizdik prezýmptsııasy men qorǵaý quqyǵy qamtamasyz etile otyryp qaralady.
— Qazaqstanda eshkim kásibı qyzmeti úshin qýdalaýǵa ushyramaıdy. Tergeý jáne protsessýaldyq áreketterdi sóz bostandyǵyna qysym retinde kórsetý — qoǵamdyq pikirdi ádeıi burmalaý. Bul ister belgili bir kózqarastarǵa nemese redaktsııalyq saıasatqa emes, jekelegen azamattardyń naqty quqyqtyq talaptaryna baılanysty qaralyp jatyr jáne olardy ýákiletti organdar zań sheńberinde tekserip jatyr. Mádenıet jáne aqparat mınıstrligi óz quzyreti sheńberinde jýrnalısterdiń quqyǵyn qorǵaýǵa jáne isterdiń ádil ári ashyq sotta qaralýyna barlyq qajetti jaǵdaı jasaýǵa daıyn. Osy oraıda halyqaralyq uıymdardy, buqaralyq aqparat quraldaryn jáne qoǵamdy tergeý aıaqtalǵanǵa deıin asyǵys qorytyndy jasamaýǵa shaqyramyn. Rastalmaǵan aqparat taratý men tergeý organdaryna qysym jasaý el ishindegi turaqtylyqqa nuqsan keltirýi múmkin.Eger sotta aıyptylardyń kinási dáleldense, jasaǵan áreketterine saı zań aldynda tıisti jazasyn alary sózsiz, — dedi mınıstr.