Qazaqstanda erteń «Mýzeıler sherýi» bastalady
NUR-SULTAN. QazAqparat – Elimizde 30 tamyzdan bastap «Mýzeıler sherýi» atty jalpyrespýblıkalyq aktsııa bastalady, dep habarlaıdy QazAqparat tilshisi.
Atalmysh shara Elbasy Nursultan Nazarbaevtyń «Rýhanı jańǵyrý» jáne «Uly dalanyń jeti qyry» baǵdarlamalyq maqalasyn iske asyrý aıasynda qolǵa alynyp otyr. Aktsııaǵa respýblıkalyq jáne aımaqtyq mýzeıler qatysady.
«Mýzeıler sherýi» aktsııasy arqyly mádenıet uıymdary ulttyq mádenı muranyń qoljetimdiligin qamtamasyz etýdi kózdep otyr. Búgin de Qazaqstanda túrli beıindegi 245 mýzeı jumys isteıdi.
«Mádenıet pen óner salasyndaǵy jańalyqtarǵa, sharalarǵa qazaqstandyqtardyń nazaryn aýdartý, mádenıet nysandaryna turǵyndardy tartý, azamattarmen birge «Rýhanı jańǵyrý» men «Uly dalanyń jeti qyry» maqalalaryn talqylaý maqsatynda osy shara qolǵa alyndy. Erteń, ıaǵnı 30 tamyzdan bastalatyn «Mýzeıler sherýi» jalpyrespýblıkalyq aktsııasy aıasynda ár aıdyń úshinshi jumasy keshki saǵat 21.00-den bastap túngi 03.00-ke deıin mýzeıler óz kelýshilerine tegin kirýge múmkindik jasaıdy», - dedi elordadaǵy Ulttyq mýzeıde ótken baspasóz máslıhatynda QR Mádenıet jáne sport mınıstrligi Zań qyzmeti departamentiniń dırektory Kúmis Seıtova.
Shara aıasynda elimizdiń barlyq mýzeıleri óz qorlarynan kelýshilerdiń túrli jas shamasyna arnalǵan mádenı-tanymdyq baǵdarlamalar daıyndaıdy. Kelýshiler Qazaqstannyń ejelgi zamanynan qazirgi kúnine deıingi tarıhy men mádenıetin, ekspozıtsııalar men kórmelerdi tamashalaı alady.
Alǵashqy bolyp «Mýzeıler sherýi» jalpyrespýblıkalyq aktsııasyn Nur-Sultan qalasyndaǵy Ulttyq mýzeı, Almatydaǵy Ortalyq memlekettik mýzeı, Á.Qasteev atyndaǵy Memlekettik óner mýzeıi, M.Tynyshbaev atyndaǵy Almaty oblystyq tarıhı-ólketaný mýzeıi, Pavlodar qalasyndaǵy P.Vasılevtyń mýzeı úıi, Qostanaı oblysynyń tarıhı-ólketaný mýzeıi ótkizedi.
