Qazaqstanda «Erte jastan eńbekke jáne kásipke baýlý» pılottyq jobasy iske qosyldy

ASTANA. KAZINFORM – Elimizde mektepke deıingi uıymdarda «Erte jastan eńbekke jáne kásipke baýlý» pılottyq jobasy júzege asyrylyp jatyr. Joba 2026 jyldyń qańtar aıynan bastap Qazaqstan Respýblıkasy Oqý-aǵartý mınıstrliginiń bastamasymen iske qosyldy.

Jobanyń negizgi maqsaty – mektep jasyna deıingi balalardyń mamandyqtar álemine qyzyǵýshylyǵyn arttyrý, eńbekke degen oń kózqarasyn qalyptastyrý jáne túrli is-áreket arqyly olardyń jeke qabiletterin damytý. 

Pılottyq jobaǵa elimizdiń 20 óńirinen 100 mektepke deıingi uıym qatysyp jatyr. Joba aıasynda balabaqshalarda balalarǵa arnalǵan arnaıy tájirıbelik baǵyttar uıymdastyrylýda. Olardyń qatarynda: zergerlik, aspazdyq, tiginshi, ınjenerlik zerthana, qurylys alańy, jylyjaı jáne baý-baqsha alańy, qolóner sheberhanasy bar. 

Bul alańdar arqyly balalar eńbek túrlerimen tanysyp, shyǵarmashylyq jáne praktıkalyq daǵdylaryn damyta alady. Pılottyq jobany iske asyrý úshin «Erte jastan kásipke jáne eńbekke baýlý» ádistemelik usynymdary men nusqaýlyqtary, sondaı-aq arnaıy is-qımyl jospary ázirlendi. 

Joba sheńberinde mektepke deıingi uıymdarda balalardyń jas erekshelikterine sáıkes túrli tanymdyq jáne tájirıbelik is-sharalar ótkizý josparlanyp otyr. Mamandardyń aıtýynsha, bul bastama balalardyń eńbekke qurmetpen qaraýyn qalyptastyryp qana qoımaı, olardyń shyǵarmashylyq áleýetin damytýǵa jáne bolashaq mamandyqtar álemine qyzyǵýshylyǵyn arttyrýǵa yqpal etedi. 

Budan buryn «Salyq keshbek» pılottyq jobasynyń merzimi uzartylǵanyn habarlaǵan edik.