Qazaqstanda erlerge qaraǵanda áıelderdiń jalaqysynyń tómendeýi baıqalady
ASTANA. QazAqparat - Qazaqstanda erlerge qaraǵanda áıelderdiń jalaqysynyń tómendeýi baıqalady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte "Damý" qorynyń basqarma tóraıymy Lázzat Ibragımova málim etti.
«Biz statıstıkalyq málimetterdi jiti baqylap otyramyz. Bizde erler men áıelder jalaqysynyń arasynda aıyrmashylyq bar. Máselen, 2005 jyly aıyrmashylyq 61 paıyzdy, al 2012 jyly 69 paıyzdy qurady. ıAǵnı, kórsetkish artyp keledi», - dedi ol.
L.Ibragımovanyń atap ótýinshe, elimizdiń Eńbek kodeksinde áıelderdiń quqyǵyn qorǵaý jan-jaqty qarastyrylǵan. «Ózderińiz de biletindeı, bizde júktiligine baılanysty eńbek demalysyna shyqqan áıelderdi qysqartpaımyz. Biz omyraýda balasy bar áıelderge sábıin árbir úsh saǵat saıyn tamaqtandyrýy úshin ýaqyt beremiz. Osy sharalardyń barlyǵy áıelderdiń tek kásibı qyzmetin atqarýymen qatar, otbasyna da qamqorlyq jasaýyna zor múmkindik jasaıdy», - dedi qor basshysy.
Sonymen qatar ol joǵary deńgeıdegi basqarýshylyq qyzmettegi áıelder sany elimizde az ekendigin, degenmen bul álemdik tendentsııa ekendigin basa aıtty.
«Máselen, Frantsııada zań bar. Oǵan sáıkes aktsıonerlik qoǵamnyń dırektorlar keńesinde qansha áıel bolýy kerektigi naqty aıqyndalǵan. Degenmen, menińshe, mundaı túbegeıli ózgerister bizdiń elimizge qajeti joq», - dedi L.Ibragımova.
