Qazaqstanda erigen qar sýyn jınaıtyn 30 sý qoımasy salynady
ASTANA. QazAqparat - Qazaqstanda erigen qar sýyn jınaıtyn 30 sý qoımasy salynady. Bul týraly búgin Astanada ótken konferentsııada QR Qorshaǵan orta jáne sý resýrstary mınıstrliginiń Sý resýrstary komıteti tóraǵasynyń orynbasary Bolat Beknııaz aıtty.
Onyń aıtýynsha, memlekettik baǵdarlama aıasynda jasalyp jatqan bul shara "bir oqpen eki qoıandy atyp alǵanmen" birdeı, bir jaǵynan halyqty tasqyn sýdyń zardabynan qutqarsa, ekinshi jaǵynan óńirdegi egistikti jazda sýaratyn sýmen qamtamasyz etedi.
«Memleket qaraýyndaǵy sý qoımalary bar óńirlerde tótenshe jaǵdaılar oryn almady deýge de bolady. Óıtkeni biz ol sýdy sý qoımalary arqyly rettep otyramyz. Al ondaı qurylystar joq jerde tabıǵatqa baılanysty bolady. Máselen Jaıyq ózeninde sý qoımalary óte az, sondyqtan kóktem kezinde biz onyń tasýyn aýyzdyqtaı almaımyz. Onyń erneýinen asqan sý tipti kórshi memleketke aǵyp ketedi deýge de bolady. Nege bizge osy sýdy Qazaqstan jerinde jınap alyp, sosyn óz paıdamyzǵa jaratpasqa», - deıdi B. Beknııaz.
Tóraǵa orynbasarynyń aıtýynsha, búginde osyndaı qurylys nysandaryn salýǵa qolaıly jerler tańdalyp qoıǵan.
«Biz barlyq oblystarmen kelisip, óńirlerdi aralap, sý qoımalaryn salýǵa bolatyn jerlerdi araladyq. Sonyń nátıjesinde Qazaqstannyń ár óńirinde 30 shaqty jańa sý qoımasyn salýǵa bolatynyna kóz jetkizdik», - dedi Bolat Beknııaz.
Onyń aıtýynsha, sý qoımalaryn salýǵa olardyń kólemine baılanysty 1 mlrd. teńgeden bastap odan joǵary kólemde qarajat ketedi.
