Qazaqstanda ereýilderdi zańsyz dep taný týraly ister qysqartylǵan tártipte qaralady

ASTANA. QazAqparat - Qazaqstanda ereýilderdi zańsyz dep taný týraly ister qysqartylǵan tártipte qaralatyn bolady. Bul týraly búgin Senattyń Áleýmettik-mádenı damý jáne ǵylym komıtetiniń keńeıtilgen otyrysynda, «Qazaqstan Respýblıkasynyń keıbir zańnamalyq aktilerine kásiptik odaqtardyń qyzmeti jáne eńbek qatynastaryn retteý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.

Atalǵan zań jobasy, qoldanystaǵy zańnamalardy «Kásiptik odaqtar týraly» zań jobasyna sáıkes keltirý maqsatynda ázirlengen. Bul rette qujat arqyly 6 zańnamalyq aktige ózgerister men tolyqtyrýlar engizý usynylady. Atap aıtqanda, Eńbek kodeksinde kásiptik odaqtardyń, olardyń birlestikteriniń respýblıkalyq, salalyq jáne óńirlik áleýmettik áriptestik deńgeılerde qyzmetkerlerdiń, múshelik uıymdardyń múddelerin bildirý ókilettilikteri naqtylanady. Al Azamattyq is júrgizý kodeksine áleýmettik-eńbek qatynastaryn retteýge baǵyttalǵan erejeler engizý kózdeledi. Atap aıtqanda, áleýmettik-eńbek janjaldaryn retteý tıimdiligin arttyrý, quqyqbuzýshylyqtyń qoǵamdyq-qaýipti saldaryn azaıtý maqsatynda ereýilderdi zańsyz dep taný týraly isterdi sottardyń qaraý merzimin qysqartý normalary (10 kúnge) usynylǵan.

Al «Qoǵamdyq birlestikter týraly» jáne «Kommertsııalyq emes uıymdar týraly» Qazaqstan Respýblıkasynyń zańdaryna áleýmettik áriptestiktiń tıisti deńgeıindegi qaýymdastyrylý (múshelik) qaǵıdattaryna negizdelgen kásipodaqtardyń qyzmetin kózdeıtin túzetýler engiziledi.

Budan bólek, zań jobasymen «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» QR Zańyna áleýmettik shıelenistiń jáne eńbek janjaldarynyń aldyn alý maqsatynda jergilikti atqarýshy organdarǵa áleýmettik shıelenistiń monıtorıngin júzege asyrý jáne eńbek janjaldarynyń týyndaý táýekelderin boljaý boıynsha fýnktsııalardy bekitip beretin normalar usynylady.

Zań jobasy palatanyń jalpy otyrysyna shyǵarylmaq.