Qazaqstanda eresekterdiń matematıkalyq ári kompıýterlik saýattylyǵy zertteledi
ASTANA. QazAqparat - Qazaqstanda PIAAC - eresekterdiń daǵdylaryn halyqaralyq zertteýdiń birinshi kezeńi bastaldy, dep habarlaıdy QazAqparat.
PIAAC - 16-dan 65 jasqa deıingi turǵyndardyń matematıkalyq, oqyrmandyq ári kompıýterlik saýattylyǵy deńgeıin aýqymdy zertteýge negizdelgen.
Aqparattyq-taldaý ortalyǵynyń málimetinshe, birinshi kezeńde (2017 jylǵy tamyz-qarasha) Astana qalasy, Aqmola, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Qyzylorda, Mańǵystaý, Pavlodar jáne Soltústik Qazaqstan oblystary aýmaǵyndaǵy eresek adamdar zertteýmen qamtylady dep kútilýde.
Al 2018 jyly (qańtar-sáýir) ótetin ekinshi kezeńde Almaty qalasy, Jambyl, Ońtústik Qazaqstan men Almaty oblystary qatysady.
Jalpy, zertteýmen 6 000-nan kem emes adam qamtylmaq. PIAAC jobasyn Ekonomıkalyq yntymaqtastyq jáne damý uıymy úılestiredi. Qazaqstanda atalǵan jobanyń ulttyq úılestirýshisi retinde QR BǴM «Aqparattyq-taldaý ortalyǵy» AQ bekitilgen.
Qazaqstannyń PIAAC-ke qatysýy eldegi eresek adamdardyń áleýeti men básekege qabilettigine táýelsiz halyqaralyq baǵa berýge, eńbek naryǵyna adamdardyń daıyndyǵy turǵysynda bilim berý júıesiniń tıimdiligin tekserýge múmkindik beredi.
Bul jobaǵa qatysatyn 37 eldiń, onyń ishinde EYDU-ǵa múshe 28 memlekettiń nátıjeleri 2019 jyly jarııalanady.
