Qazaqstanda eresekterdiń 70 paıyzy memlekettik tildi meńgergen - A. Qyryqbaev
ASTANA. 16 qazan. QazAqparat - Qazaqstandaǵy eresekterdiń 70 paıyzy memlekettik tildi meńgergen. Búgin Májilistiń Áleýmettik-mádenı damý komıtetiniń keńeıtilgen otyrysynda «Memlekettik tildi damytýdaǵy problemalar týraly» máseleni talqylaý barysynda Mádenıet jáne aqparat vıtse-mınıstri Arman Qyryqbaev osylaı málim etti.
Sóz arasynda vıtse-mınıstr memlekettik tildiń damý máselesi el táýelsizdiginen beri ózektiligin joǵaltpaǵanyn, osy baǵytta atqarylǵan saıasatta bir jaǵynan til damýynyń múmkindikteri paıda bolyp, ekinshi jaǵynan ártúrli kúrmeýli problemalardyń kúnnen kúnge artyp otyrǵanyn atap ótti.
«Jalpy qazaq tilinde tárbıeleıtin bala-baqshalar sany 2 myń 591-ge jetti. Bul 1991 jylmen salystyrǵanda 1433-ke kóp kórsetkish. Táýelsizdik jyldary 900-ge tarta tolyqqandy qazaq tildi mektepter ashylyp, búgingi kúni olardyń sany 3 myń 830-ǵa jetti. 1989-1990 oqý jyldarynda qazaq mektepterinde 910 myń oqýshy bilim alsa, qazir olardyń sany 1 mln. 600 myńnan asyp otyr. Budan bólek, respýblıkamyzda memlekettik tildi meńgergen eresekter sany jyldan jylǵa kóbeıýde. Eger 2008 jylǵy kórsetkish boıynsha olardyń paıyzdyq úlesi 51-ge teń bolsa, qazirgi tańda bul kórsetkish 70 paıyzǵa jetip otyr. ıAǵnı, bul resmı málimetterge sáıkes kórsetkish», - deıdi vıtse-mınıstr A. Qyryqbaev.
Degenmen, mınıstrlik ókili memlekettik tildi damytý baǵytynda tek jetistikter ǵana bolyp otyrmaǵanyn, sol úshin memlekettik organdar tarapynan kúrdeli problemalardy sheshýge nazar aýdarylyp jatqanyn málim etti. Osy rette vıtse-mınıstr qordalanǵan problemalardyń úsh negizgi bóligine toqtaldy. «Bul birinshiden, qoǵamdaǵy memlekettik tildi meńgerý deńgeıiniń ártektiligi. Ekinshiden, eldiń qoǵamdyq-saıası ómirine memlekettik tildiń áli de bolsa baıaý engizilýi. Úshinshiden, til mádenıetiniń tómendigi. Osy úsh problemany júıeli túrde sheshý qajettilikteri memlekettik tildi damytý salasyndaǵy naqty jumystarǵa negizdelgen», deıdi ol.
