Qazaqstanda erekshe qajettiligi bar balalardy qoldaýǵa arnalǵan jańa zań ázirlenip jatyr

ASTANA. KAZINFORM – Elimizde «Múmkindigi shekteýli balalardy (tulǵalardy) keshendi qoldaý týraly» jańa Zań jobasy daıyndalyp jatyr. Qujat Memleket basshysynyń IV Ulttyq quryltaıda bergen tapsyrmasy men Parlament Senaty depýtattarynyń bastamasy aıasynda ázirlenýde.

Zańnyń basty maqsaty – erekshe qajettilikteri bar balalar sapaly bilim alý úshin medıtsınalyq, bilim berý jáne áleýmettik qyzmetterge teń ári úzdiksiz qoljetimdilikti qamtamasyz etý.

– Zańnyń qabyldanýy keshendi kómekke muqtaj balalar úshin kelisilgen, ataýly jáne turaqty qoldaý júıesin qurýǵa múmkindik beredi. Qujat Qazaqstanǵa 2024 jyly BUU-nyń Múgedekter quqyqtary jónindegi komıteti bergen usynymdaryn iske asyrý maqsatynda ázirlendi, – dedi QR Oqý-aǵartý mınıstrliginiń Inklıýzıvti jáne arnaıy bilim departamentiniń dırektory Bulbul Eleýsinova.

Qazirgi tańda Qazaqstanda erekshe bilim berý qajettilikteri bar 235 myń bala bar. Bul baǵytta 508 arnaıy bilim berý uıymy jumys isteıdi.

Onyń ishinde:
– 110 PMPK,
– 230 KPPK,
– 99 arnaıy mektep,
– 45 arnaıy balabaqsha,
– 13 ońaltý ortalyǵy,
– 11 aýtızm ortalyǵy bar.

Inklıýzıvti bilim berýdi keńeıtý úshin árbir bilim berý uıymynda psıhologııalyq-pedagogıkalyq qoldaý qyzmetteri ashyldy. Qazirgi tańda 29 myńnan astam maman kómek kórsetip otyr, myńnan asa ınklıýzııa kabıneti jumys isteıdi. Jalpy, balalardy arnaıy psıhologııalyq-pedagogıkalyq qoldaýmen qamtý deńgeıi 85%-dy quraıdy.

Aıta keteıik, erekshe bilim berýdi qajet etetin balalar úshin ınklıýzıvti oqý-ádistemelik quraldar tizbegi bekitiledi.