Qazaqstanda erekshe qajettiligi bar 751 myń adam turady
ASTANA. KAZINFORM — «Ádilet» partııasynyń saılaýaldy baǵdarmasynda áleýmettik qoldaýǵa aıryqsha mán beriledi. Partııanyń kezekten tys III sezinde Quryltaı saılaýyna atalǵan partııadan usynylatyn kandıdat Dınara Zákıeva múgedektigi bar azamattar men zeınetkerlerdiń jaǵdaıyn jaqsartýǵa baǵyttalǵan josparlardy bólisti.
— Qazaqstanda erekshe qajettiligi bar 751 myń adam turady. Bul baǵytta azamattardy áleýmettik qorǵaý — tek járdemaqy tóleý nemese qyzmet kórsetý ǵana emes, eń bastysy — olardyń bilim alýyna, eńbek etýine, erkin júrip-turýyna jaǵdaı jasaý. Osy baǵytta baǵdarlamada ózekti máselelerdi sheshý úshin biraz is-sharany usynyp jatyrmyz. Mysaly, jasandy ıntellektini paıdalana otyryp, múgedektikti syrttaı proaktıvti túrde belgileý tájirıbesin nyǵaıtý qajet. «Jeke áleýmettik vaýcherlerdi», úı jaǵdaıynda ońaltý tájirıbesin barlyq óńirde engizý kerek. Odan bólek, erekshe qajettilikteri bar balalarmen jumys isteıtin mamandardy sapaly daıyndaý úshin oqý baǵdarlamalaryn jańartý, sondaı-aq, ınteraktıvti kartada kórsetilgen nysandardyń jáne jańa ınfraqurylymnyń qoljetimdiligin kamtamasyz etý qarastyrylǵan, — dedi ol.
Sonymen birge, Dınara Zákıevanyń sózinshe, qarııalarǵa laıyqty zeınetaqy tólenip, olardyń uzaq ómir súrýine jaǵdaı jasalýǵa tıis.
— Aǵa býynǵa qamqorlyq — bul tek zeınetaqymen qamtamasyz etý ǵana emes, laıyqty jáne belsendi ómir súrýge múmkindik berý. Bul baǵytta «Eresek eriktiler» bastamasyn qoldap, olardyń tsıfrlyq saýattylyǵyn arttyrý qajet. Sondaı-aq, qoldaýdy qajet etetin adamdarǵa uzaq merzimdi kútim júıesin damytý kerek, — dedi ol.
Aıta keteıik, buǵan deıin bıýdjettiń 20%-y áleýmettik qajettilikterge baǵyttalatyny jónindegi Dınara Zákıevanyń málimdemesin jarııalaǵanbyz.
