Qazaqstanda erekshe balalarǵa arnalǵan óner jobasy jarııalandy

NUR-SULTAN. QazAqparat – Elimizde talantqa ıe erekshe balalardyń sahnaǵa shyǵyp, óner kórsetý múmkindigi bar. «Arman asýlary» atty jańa joba týraly Roza Baǵlanova atyndaǵy «Qazaqkontsert» memlekettik kontserttik uıymy dırektorynyń shyǵarmashylyq qyzmet boıynsha orynbasary Serik Nurmoldaev málim etti, dep habarlaıdy QazAqparat tilshisi.

«Arman asýlary» atty erekshe balalarǵa arnalǵan ınklıýzıvti jobany bastaǵaly jatyrmyz. Elimiz boıynsha talanty bar erekshe balalardy jınap, sahnaǵa shyǵýyna jaǵdaı jasaımyz. Sol sııaqty olar bizdiń óner juldyzdarymen birge án aıtatyn bolady. Sonymen qatar bizde «Orteke» atty qýyrshaqtar teatry bar. Atalǵan óner ujymy bıyl ıÝNESKO-nyń tizimine endi. Osy oraıda elimizde qýyrshaqtar forýmyn ótkizý josparda bar. Odan bólek, «Astana sazy» folklorlyq etnografııalyq ansambli jumys isteıdi. Jetekshisi Baýyrjan Aqtaev. Osy ujym bıyl neshe jylǵy eńbekterin jınap, alǵash ret albom jarııalaǵaly otyr», - dedi Serik Nurmoldaev elordada ótken baspasóz máslıhatynda.

Sondaı-aq, spıker otandyq jas kompozıtorlardy qoldaý maqsatynda «Qazaqkontsert rezıdentsııasy» atty jobanyń qolǵa alynyp jatqany týraly aıtty.

«Taǵy bir jańalyǵymyz «Álem sazy» atty halyqaralyq festıval ótkizbekpiz. Oǵan 10-nan astam elden ókilderi qatysady. Sheteldik ónerpazdar 1 apta boıy kontsert ótkizedi. Ýaqyty týraly qosymsha habarlanady», - deıdi ol.

Aıta ketsek, atalǵan ujymnyń uıytqy bolýymen jaz boıy astanalyq balalar tegin kıno kórý múmkindigine ıe boldy.

Buǵan deıin «Qazaqkontsert» ujymy gastroldik saparmen el aralap kontsert beretini týraly habarlaǵan edik.