Qazaqstanda er adamdardyń 44 paıyzy temeki shegedi – DDSU

NUR-SULTAN. QazAqparat – Dúnıejúzilik densaýlyq saqtaý uıymy temekimen birge Qazaqstandaǵy er adamdardyń 54 paıyzy ishimdikten ketary emes ekenin anyqtaǵan, dep habarlaıdy QazAqparat tilshisi.

Dúnıejúzilik densaýlyq saqtaý uıymynyń zertteý málimetin QR Densaýlyq saqtaý mınıstrliginiń Qoǵamdyq densaýlyq saqtaý ulttyq ortalyǵy bólisip otyr. Ortalyqtyń habarlaýynsha, Qazaqstandaǵy densaýlyq saqtaý salasynyń ulǵaıyp kele jatqan úlken problemasyna juqpaly emes aýrýlar jáne olardyń qaýip faktorlary (temekini tutyný, ishimdikti shekten tys paıdalaný, durys tamaqtanbaý jáne dene qımylynyń azaıýy) jatady.

«Dúnıejúzilik densaýlyq saqtaý uıymy júrgizgen zertteýlerdiń nátıjeleri boıynsha, Qazaqstanda er adamdardyń 44 paıyzy temeki shegedi, 54 paıyzy ishimdik ishedi. Qazaqstanda alkogoldi tutyný deńgeıi - Eýropa aımaǵyndaǵy eń joǵary kórsetkishterdiń biri. 2016 jyly bul kórsetkish er adamda jylyna shamamen 25,0 lıtr alkogoldi, al áıelderde 8,9 lıtrdi qurady. Jastardyń 57 paıyzdan astamy (15-19 jas) sońǵy 30 kúnde bir ýaqytta 60 jáne odan da kóp gramm ishimdik ishken», - delingen Qoǵamdyq densaýlyq saqtaý ulttyq ortalyǵynyń habarlamasynda.

Ortalyqtyń habarlaýynsha, temekige salynatyn salyqty kóterý - temekiniń qoljetimdiligi men ony tutynýdyń tómendeýine ákeledi.

«DDSU usynystaryna sáıkes, ortasha jáne tómen kirisi bar elderde alkogolge qarsy saıasatqa qatysty eń tıimdi sharalar alkogoldik ishimdikterge aktsızdik salyqtardy kóterý, alkogoldi jarnamalaýǵa tyıym salýlar nemese shekteýlerdi qabyldaý jáne saqtaý bolyp otyr», - delingen habarlamada.