Qazaqstanda epılepsııaǵa shaldyqqan 120 myń adamnyń derti áli anyqtalmaǵan - SVS Nevro qoǵamdyq birlestiginiń basqarma tóraǵasy
ALMATY. 17 qańtar. QazAqparat - Densaýlyq saqtaý mınıstrliginiń málimetine qaraǵanda, epılepsııamen aýyratyn naýqastar sany Qazaqstanda qazir 32 myń adamdy quraıdy.
Bul týraly Almatyda ótken 2 kúndik halyqaralyq kongreste aıtyldy.
«Epılepsııaǵa shaldyqqan jandar sany álemdik ortasha statıstıka boıynsha jalpy halyqtyń 1,5 paıyzyn quraıdy. Olardyń úlesi Qazaqstanda shamamen 160-180 myń, ıaǵnı 120 myń adamnyń naýqasy áli anyqtalmaǵan. Óıtkeni kóptegen patsıentter óziniń syrqatynan habarsyz», - deıdi SVS Nevro qoǵamdyq birlestiginiń basqarma tóraǵasy Sergeı Savınov. Onyń aıtýynsha, der kezinde tekserilmese, bul adamdardyń syrqaty keıin asqynyp, emdelýge kesh bolýy múmkin. Jalpy bul naýqastardyń 65-70 paıyzy balalar arasynda kezdesedi. Olardy anyqtap, emdeý eń aldymen patsıentterge jáne dárigerlerge baılanysty. Ókinishke oraı, aýrýdy anyqtaıtyn álemdegi eń ozyq jańa dıagnostıkalyq jabdyqtar memlekettik mekemelerde áli joq. Máselen magnıttik endıflıýrografııa qazir Qaraǵandydaǵy jeke medıtsınalyq mekemede ǵana bar. Alaıda ol áli iske qosylǵan joq.
