Qazaqstanda epıdemııaǵa qarsy sharalar jospary bar – Prezıdent
NUR-SULTAN. QazAqparat – Qazaqstanda epıdemııaǵa qarsy sharalar jospary ázirlengen. Bul týraly QR Prezıdenti Qasym-Jomart Toqaev telearna arqyly úndeýinde aıtty, dep habarlaıdy QazAqparat.
«Memlekettik shekaradaǵy, stantsııalar men áýejaılardaǵy ótkizý pýnktterinde sanıtarlyq-epıdemıologııalyq rejım kúsheıtildi. Meniń tapsyrmammen dári-dármekterdi, test júıelerin jáne zerthanalyq jabdyqtardy satyp alýǵa Úkimet rezervinen qarajat bólindi. Elimizdiń aýrýhanalarynda tósek-oryn sany jetkilikti. Memlekettik organdar sanıtarlyq-profılaktıkalyq jáne epıdemııaǵa qarsy sharalardy uıymdastyrýdyń josparlaryn ázirlep qoıdy», - dedi Memleket basshysy telearnalar arqyly kórsetilgen úndeýinde.
Prezıdent Qazaqstan azamattaryn ýákiletti qyzmetterge kómektesýge shaqyrdy.
«Mundaı jaǵdaıda bárimiz jaýapkershilik pen tártip kórsetýimiz qajet. Aýrý belglerii baıqalsa, dereý turǵylyqty jerińizdegi medıtsınalyq qyzmetke júginińiz. Medıtsınalyq tekserýden jaltaryp, karantın rejımin buzǵandar jazalanady. Ózińizge jáne jaqyn adamdaryńyzǵa qamqorlyqtyń qarapaıym joldaryn este ustańyz: qolyńyzdy únemi jýyp, sanıtarlyq gıgıenany saqtańyz, halyq kóp jınalatyn oryndarǵa barmańyz», - dedi Q. Toqaev.
Sonymen birge, Prezıdent bul kúnderi medıtsına qyzmetkerlerine aýyrtpalyq túsetinin eske saldy.
«Kóp nárse olardyń kásibıligine baılanysty bolmaq. El ómirindegi kúrdeli kezeńnen bizdiń dárigerler abyroımen ótip, qazaqstandyqtardyń densaýlyǵyn saqtaý úshin bar jaǵdaıdy jasaýy kerek», - dedi Memleket basshysy.
Aıta keteıik, QR Prezıdenti Qasym-Jomart Toqaev el halqyna úndeý joldady. Joldaýdyń tolyq mátini arnaıy jarııalandy.
