Qazaqstanda engizilmek mindettelgen saqtandyrýdyń artyqshylyǵy qandaı

ASTANA. QazAqparat - Qazaqstanda mindettelgen saqtandyrýdy engizý qarastyrylýda. Bul týraly búgin Úkimettiń selektorlyq rejımdegi otyrysynda «QR-nyń keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasyn tanystyrǵan elimizdiń Ulttyq banki tóraǵasy Danııar Aqyshev málim etti, dep habarlaıdy QazAqparat.

«Zań jobasynda Qazaqstanda mindettelgen saqtandyrýdy engizý  kózdelgen. Kóptegen elderdiń tájirıbesi dástúrli mindetti saqtandyrýdan mindettelgen saqtandyrýǵa ótýdi kórsetip otyr. Mysaly, Frantsııanyń zańnamasynda mindetti saqtandyrýdyń 104 túri bar. Onyń ishinde 4-eýi ǵana dástúrli mindetti saqtandyrýǵa jatady. Qalǵan 100 mindettelgen saqtandyrý», - dedi D.Aqyshev.

Onnyń túsindirýinshe, mindettelgen saqtandyrýdyń artyqshylyǵy saqtandyrý sharty bolýy týraly talapty zańnamalyq bekitý jáne onyń mańyzdy talaptary kezinde saqtandyrýdyń naqty talaptary arnaıy zańda emes, shartta belgilengendiginde.

«Qazirgi ýaqytta mindettelgen saqtandyrýǵa uqsas saqtandyrý keden isi týraly kodekste júzege asyrylǵan. Onda keden ókilinde, ýaqytsha saqtaý qoımalarynyń ıelerinde saqtandyrý shartynyń bolýy kózdelgen. Mundaı normalar «Atqarýshylyq is júrgizý jáne sot oryndaýshylarynyń mártebesi týraly» Zańda da bar. Onda jeke sot oryndaýshysynda saqtandyrý shartynyń bolýy talap etiledi. Mindettelgen saqtandyrýdy engizý klıenttiń múddesin qorǵaıtyn saqtandyrýdyń ıkemdi talaptaryn eskerýge, saqtandyrý ónimderin jaqsartýǵa jáne táýekelderdiń naqty tizbesin anyqtaýǵa múmkindik beredi», - dedi D.Aqyshev.

Atalǵan Zań jobasy Úkimet músheleri tarapynan tolyq qoldaýǵa ıe bolǵannan keıin, bir aıdyń ishinde Májilis qaraýyna engizilmek.