Qazaqstanda energııany únemdeý jumystary qalaı júrip jatyr
Astanada energııa únemdeý boıynsha dástúrli V halyqaralyq forým ótip jatyr. Sarapshylar Qazaqstannyń túrli sektorlaryndaǵy energııa tutynýdyń jaı-kúıin talqylady, dep habarlaıdy Kazinform.
Forýmnyń ashylýynda Májilis depýtaty, Ekologııa jáne tabıǵatty paıdalaný máseleleri jónindegi komıtet tóraǵasy Edil Jańbyrshın Memleket basshysy Qasym-Jomart Toqaevtyń bıylǵy Joldaýynda energııany únemdeý jáne tıimdiligin arttyrý salasyn erekshe atap ótkenin eske saldy.
«Úkimet EYDU standarttaryn eskere otyryp, qoldanystaǵy energııa tıimdiligi saıasatyn túbegeıli qaıta qaraýy qajet. Bul týraly Prezıdent óz Joldaýynda atap ótti. 2029 jylǵa qaraı aldymyzda energııa tutynýdyń jáne energııa syıymdylyǵynyń negizgi kórsetkishterin keminde 15%-ǵa tómendetý mindeti tur. Sondaı-aq qazirgi qalyptasqan energııa únemdeý júıesiniń bastalýy 2012 jyly energııa únemdeý jáne energııa tıimdiligin arttyrý saıasatynyń negizgi baǵyttaryn kózdeıtin arnaıy zań qabyldaý arqyly aıqyndaldy», - dedi Edil Jańbyrshın.
Depýtattyń aıtýynsha, osy saıasatty belsendi iske asyrý arqyly Qazaqstan 2021 jyly energııa syıymdylyǵynyń 2008 jylǵy deńgeıinen 38,5%-ǵa tómendeýine qol jetkizdi. Alaıda depýtat bul salada áli de kóp jumys atqarylýy kerek dep sanaıdy.
«Halyqaralyq energetıkalyq agenttiktiń málimetinshe, Qazaqstannyń energııa syıymdylyǵy 2021 jyldyń qorytyndysy boıynsha álemdegi ortasha deńgeıden eki ese, al EYDU elderimen salystyrǵanda 3,2 ese joǵary boldy. Energııa tutynýdyń kóp bóligi óndiristik jáne turǵyn úı salalaryna tıesili. Aıta ketý kerek, ónerkásip sektory kúrdeli jańǵyrtýdy talap etedi», - deıdi Májilis depýtaty.
QR Ónerkásip jáne qurylys mınıstrligi Ónerkásip komıtetiniń tóraǵasy Azamat Panbaev 2018 jyly Qazaqstan alǵash ret energııa únemdeý forýmyn ótkizgenin aıtty. Al 2019 jyly 11 qarasha Energııany únemdeý kúni bolyp jarııalanǵan.
Onyń aıtýynsha, BUU Bas Assambleıasy 2014-2024 jyldardy barlyǵy úshin turaqty energetıkanyń onjyldyǵy dep jarııalaǵan. BUU alǵa qoıǵan úsh maqsattyń biri – 2030 jylǵa qaraı energııa tıimdiliginiń jahandyq kórsetkishin eki ese arttyrý.
«Ekonomıkanyń damýy energııa resýrstaryn tutynýdyń ósýimen tyǵyz baılanysty. Olardy tıimsiz paıdalaný qorshaǵan ortanyń sarqylýyna jáne lastanýyna ákeledi. Bul faktor álemdik qoǵamdastyqty jaýapty tutynýdy engizý jáne ornyqty ósýdi qamtamasyz etý boıynsha batyl is-qımyl jasaýǵa májbúr etedi», - deıdi Azamat Panbaev.
Taǵy bir mańyzdy taqyryp Qazaqstanda elektromobılızatsııany damytý boldy. Sarapshylar elektromobılder úshin ınfraqurylymdy jedel damytý jáne taza kólikti paıdalanýdy yntalandyrý sharalaryn engizý qajet ekenin aıtty.
