Qazaqstanda energııamen jabdyqtaýshy uıymdar úshin elektr energııasynyń tarıfi tómendetilmek
NUR-SULTAN. QazAqparat – Qazaqstanda energııamen jabdyqtaýshy uıymdar úshin elektr energııasynyń tarıfin tómendetý josparlanyp otyr. Bul jaıynda QR Premer-Mınıstriniń orynbasary Roman Sklıardiń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Búgingi kúni elektr energııasynyń sońǵy tarıfi ony óndirý (55 paıyz), tasymaldaý (40) jáne energııamen jabdyqtaýshy uıymdardyń ústemesine ketetin shyǵyndardan quralady. Energııamen jabdyqtaýshy uıymdardyń ortasha bosatý quný tutynýshylardyń toptary, onyń ishinde jeke tulǵalar úshin elektr energııasyn tutynýy kólemi boıynsha saralanady», - dedi Roman Sklıar.
Onyń atap ótýinshe, retteletin energııamen jabdyqtaýshy uıymdar respýblıkanyń túrli óńirlerindegi halyqtyń shamamen 96 paıyzyn elektr energııasymen jabdyqtap otyr. Olardyń basym kólemin, shamamen 60 paıyzyn jeke tulǵalar alady. Osyǵan oraı tutynýshylar toptary arasyndaǵy tarıf deńgeıiniń aıyrmashylyǵyn qysqartý maqsatynda tutynýdyń turaqty kólemine kepildik beretin energııamen jabdyqtaýshy uıymdarǵa barynsha arzan elektr energııasyn usyný máselesi talqylanyp jatyr.
«Buǵan qosa, halyqtyń muqtaj jáne áleýmettik osal toptary úshin tarıfterdi ataýly tómendetý tetigi qoldanystaǵy zańnama talaptaryn eskere otyryp, tyńǵylyqty zerdeleýdi talap etedi. Tolyqtaı alǵanda, elektr energııasy máseleleri Úkimettiń baqylaýynda tur», - dedi Roman Sklıar.
