Qazaqstanda energııa resýrstarynyń shyǵynyn 90%-ǵa qysqartý josparlanyp otyr
ASTANA. KAZINFORM – Qazaqstanda otyn-energetıka keshenin tsıfrlandyrý arqyly energııa resýrstarynyń shyǵynyn 90%-ǵa deıin qysqartý josparlanyp otyr. Bul týraly Úkimet otyrysynda Energetıka mınıstri Erlan Aqqenjenov málimdedi.
Onyń aıtýynsha, Digital Qazaqstan strategııasy aıasynda mınıstrlik otyn-energetıka keshenin tsıfrlandyrý boıynsha úsh baǵytta 20 is-sharany iske asyryp jatyr.
– Kútiletin nátıje – nysandardaǵy apattylyqty 25%-ǵa tómendetý jáne energııa resýrstarynyń shyǵynyn 90%-ǵa qysqartý. Ekonomıkalyq áseri jylyna shamamen 23 mlrd teńge, – dedi mınıstr.
Qazir salada jasandy ıntellektini qoldanýǵa baǵyttalǵan 45 jobadan turatyn portfel qalyptastyrylǵan. Gaz salasynda AI gaz tutynýdy boljaýǵa, munaı-gaz salasynda munaı ónimderiniń aınalymyn taldaýǵa, al elektr energetıkasynda óndiristik qaýipsizdikti arttyrýǵa paıdalanylady.
Mınıstrdiń aıtýynsha, «QazMunaıGaz» kompanııasy EmbiMunaıGaz ken ornynda tsıfrlyq egiz qurý boıynsha pılottyq jobany iske asyryp jatyr. Joba óndiristik nysandar týraly derekterdi biriktiredi. Ony keńinen engizý nátıjesinde munaı óndirý kólemin qosymsha 2,9 mln tonnaǵa deıin ulǵaıtý kútiledi.
Sonymen qatar Astana qalasynyń energetıkalyq kesheni nysandarynyń tsıfrlyq egizderin qurý jumystary júrgizilip jatyr. Bul otyndy 2,5%-ǵa deıin únemdeýge múmkindik beredi.
Mınıstrdiń aıtýynsha, jyl sońyna deıin basym jasandy ıntellekt sheshimderiniń tizilimin, tsıfrlyq egizderdiń nysanaly arhıtektýralaryn jáne kıberfızıkalyq qaýipsizdik arhıtektýrasyn bekitý josparlanǵan.
– Bul kásiporyndarǵa standartty sheshimderdi paıdalanýǵa jáne tabysty jobalardy salanyń barlyq nysandaryna jedel engizýge múmkindik beredi, – dedi Erlan Aqqenjenov.
Budan bólek, energetıka nysandarynyń kıberfızıkalyq qaýipsizdigin kúsheıtý jumystary júrgizilip jatyr. Onyń ishinde tehnologııalyq jelilerdi qorǵaý, kıberqaýipterdi anyqtaý jáne ushqyshsyz ushý apparattaryn anyqtap, beıtaraptandyrý tetikteri qarastyrylǵan.
2026 jyly tsıfrlyq egizderdiń pılottyq jobalaryn iske asyrýǵa, jasandy ıntellekt sheshimderin engizýge jáne biryńǵaı arhıtektýrany bekitýge basymdyq beriledi.
Al 2029 jylǵa qaraı barlyq josparlanǵan is-sharalardy aıaqtap, otyn-energetıka keshenin tsıfrlyq derekter negizinde basqarýǵa kóshý josparlanyp otyr.
Aıta keteıik, EO data-ortalyqtardyń energııa men sýdy tutynýyn shektemek.
