Qazaqstanda energııa berýshi uıymdardy irilendirý tetigi anyqtaldy
NUR-SULTAN. QazAqparat - Qazaqstanda energııa berýshi uıymdardy irilendirý tetigi anyqtaldy. Bul týraly búgin Energetıka mınıstrliginiń alqa otyrysynda vedomstvo basshysy Nurlan Noǵaev aıtty, dep habarlaıdy QazAqparat tilshisi.
Vedomstvo basshysynyń sózine qaraǵanda, óńirlik elektrjelilik kompanııalardy irilendirýge baǵyttalǵan jumys júrgizilip jatyr. Búgingi tańda energııa berýshi uıymdardy irilendirý úshin kezeń-kezeńmen engiziletin talaptar belgilendi. Qabyldanǵan sharalar talaptarǵa sáıkes kelmeıtin energııa berýshi uıymdardy ózara nemese óńirlik elektr jelilik kompanııalarmen biriktirý arqyly irilendirý, sondaı-aq elektr energııasyn berý jónindegi qyzmetin toqtatý úshin yntalandyrýǵa baǵyttalǵan. Kútiletin nátıje – energııa berýshi uıymdar sanyn 30 paıyzǵa, ıaǵnı 162-den 110-ǵa deıin qysqartý.
Sondaı-aq mınıstr ıesiz jelilerdiń uzyndyǵy 2017 jyly 2 350 shaqyrymnan 2019 jyly 225 shaqyrymǵa deıin qysqarǵanyn atap ótti.
«Bul rette jergilikti atqarýshy organdar júrgizgen jumystar aıasynda jańa ıesiz nysandar anyqtalýda. Júrgizilgen jumystardyń nátıjesinde kórsetiletin qyzmet sapasynyń artýy baıqaldy», - dedi ol.
