Qazaqstanda energetıkalyq sýsyndar aktsızdeletin taýarlar qataryna qosyldy
ASTANA. KAZINFORM — QR Salyq kodeksine sáıkes 2026 jyldyń 1 qańtardan bastap energetıkalyq sýsyndar aktsızdeletin taýarlar tizbesine engizildi. Bul týraly Memlekettik kirister komıteti málim etti.
Búgingi kúnge energetıkalyq sýsyndar alkogolsiz ónimder naryǵynyń qalyptasqan jáne turaqty segmenti.
QR atalǵan ónimdi óndirý jáne ımporttaý qyzmetin 5 otandyq óndirýshi jáne 5 iri ımporttaýshy júzege asyrady. Sonymen qatar óndiristiń edáýir bóligi el ishinde shoǵyrlanǵan. Qazaqstandyq kásiporyndar ishki naryqtyń qajettiligin qamtamasyz etip qana qoımaı, ónimdi shetelge de tabysty eksporttaýda, bul salanyń damýy men eksporttyq áleýetiniń bar ekenin kórsetedi.
Ónimniń osy sanaty boıynsha aktsız mólsherlemelerin kezeń-kezeńimen engizý kózdelgen: 2026 jyldan bastap aktsız mólsheri 1 lıtr úshin 100 teńgeni, 2027 jyldan bastap — 140 teńgeni, 2028 jyldan bastap — 180 teńgeni quraıdy.
— Aktsızdik retteýdi engizý energetıkalyq sýsyndar aınalymynyń ashyqtyǵyn qamtamasyz etýge, bıýdjetke salyq tólemderiniń tolyq ári ýaqtyly túsýine, sondaı-aq naryqtyń barlyq qatysýshylary úshin teń jáne ádil jaǵdaılar qalyptastyrýǵa baǵyttalǵan, - dep habarlady komıtetten.
Sala ókilderiniń baǵalaýy boıynsha energetıkalyq sýsyndardy negizgi kámeletke tolǵan azamattar tutynady. Osyǵan baılanysty atalǵan ónimdi ótkizý kezinde zańnamada belgilengen talaptar men shekteýlerdiń saqtalýyna erekshe nazar aýdarylatyn bolady.
QR QM MKK múddeli memlekettik organdarmen birlesip salyqtyq ákimshilendirý tetikterin jetildirý, naryqtyń ashyqtyǵyn arttyrý, sondaı-aq adal bıznes úshin qolaıly jaǵdaılar jasaý baǵytyndaǵy júıeli jumysty jalǵastyrady.
Eske sala keteıik, buǵan deıin Oljas Bektenov balalardyń energetıkalyq sýsynǵa qumartýyn qaýipti dep baǵalaǵan edi.
